معرکہ حق اچ افواج پاکستان دا زور دار مکا مودی سرکار کوں کڈاہیں نا ٻھلسی، مصنوعی ذہانت دی تربیت کیتے نینگراں کوں چین اتے یورپ بھیڄیا ویسی، وزیراعظم دا یونیورسٹی آف ہری پور اچ پرائم منسٹر لیپ ٹاپ سکیم دی تقریب نال خطاب

ہری پور ۔17 دسمبر(اے پی پی)وزیراعظم محمد شہباز شریف آکھیے جو معرکہ حق اچ افواج پاکستان دا زور دار مکا مودی سرکار کوں کڈاہیں نا بھلسی، معیشت منجدھار توں نکل آئی اے، ملک ڈیفالٹ توں بچ گئے، ہݨ گروتھ دو ودھݨے، ترقی اتے خوشحالی دا پندھ سارے صوبیاں تے منحصر اے، چارے صوبے مل تے ترقی کریسن تاں پاکستان عظیم ملک ٻݨسی۔ اے ڳالھ انہاں یونیورسٹی آف ہری پور اچ پرائم منسٹر لیپ ٹاپ سکیم دی تقریب نال خطاب اچ آکھی۔ تقریب اچ وفاقی وزیر امور کشمیر و گلگت بلتستان انجینئر امیر مقام، وفاقی وزیر مذہبی امور سردار محمد یوسف، وفاقی وزیر اطلاعات و نشریات عطا اللہ تارڑ، چیئرمین وزیراعظم یوتھ پروگرام رانا مشہود احمد خاں اتے رکن قومی اسمبلی بابر نواز خان اتے اعلیٰ افسران وی موجود ہن۔ وزیراعظم آکھیا جو لیپ ٹاپ سکیم ونڈݨ دی تقریب اچ شرکت تے خوشی تھیندی پئی اے، خیبر پختونخوا دے لوک ٻہوں دلیر تے غیور ہین، انہاں دہشت گردی دے خلاف وڈیاں قربانیاں ڈتین، ایندے نال نال افواج پاکستان، قانون نافذ کرݨ والے اداریاں تے پولیس دے اعلیٰ افسران تے جواناں دی عظیم قربانیاں پاروں پاکستان قائم دائم اے، تاریخ انہاں عظیم قربانیاں کوں کڈایں نال بھلسی، قیامت تئیں انہاں کوں سوھݨے لفظاں نال یاد رکھیا ویسی۔ وزیراعظم آکھیا جو لیپ ٹاپ گھنݨ والے عظیم ٻال، انہاں دے والدین تے اساتذہ مبارکباد دے حق دار ہن، اے ہونہار طلبہ و طالبات قوم دے ہیرو ہن جیہڑے قوم دے عظیم معمار بݨݨ ویندے پئن تے یقیناً پاکستان دی تقدیر دی کنجی انہاں دے ہتھ اچ اے۔ پاکستان دی ترقی اتے خوشحالی دی ضمانت ملک دی نینگر نسل اے۔ وزیراعظم آکھیا جو چین توں میرٹ تے ہک ہزار طلبہ و طالبات زرعی شعبے دی اعلیٰ تربیت گھن تے آئن۔ وزیراعظم آکھیا جو ملک دی ترقی کہیں ہک یا ݙو صوبیاں تے منحصر کائنی ٻھل چارے صوبے مل تے ترقی کریسن تاں پاکستان عظیم ٻݨسی۔ اے کم محنت، امانت، دیانت تے اتحاد نال تھیسی۔ وزیراعظم آکھیا جو معرکہ حق اچ 6 اتے 10 مئی دے دوران بھارت کوں افواج پاکستان دا زور دار مکا لڳیے، قوم دیاں دعاواں نال مودی سرکار کوں او سبق سکھایا گیا جیہڑا او کڈہیں نا بھلسی۔ اللہ تعالیٰ قوم کوں عظیم فتح ڈتی جیندے نال پوری دنیا اچ پاکستان دی عزت ودھی اے۔ وزیراعظم آکھیا جو مصنوعی ذہانت دی تربیت کیتے طلبہ کوں چین تے یورپ بھیڄیا ویسی، معیشت میکرو لیول تے مستحکم اے، ہݨ انڈسٹری، زراعت، آئی ٹی تے معدنیات اچ روزگار دے موقع پیدا کرݨین، وفاقی اتے صوبائی حکومتاں مل تے فیصلہ کرن تاں ملک تیزی نال ترقی کریسی۔ وزیراعظم آکھیا جو لیپ ٹاپ گھنݨ والیاں اچ شہداء دے پتر وی شامل ہن جیہڑے ساڈا ماݨ ہین، شہداء دی تضحیک کرݨ والے کوں نہ دنیا اچ عزت ملسی نہ اللہ معاف کریسی۔

وزیراعظم ہری پور اچ دانش سکول، طالبات کیتے انج کیمپس اتے پل بݨاوݨ دا اعلان وی کیتے۔ تقریب نال رانا مشہود، بابر نواز خان تے انجینئر امیر مقام وی خطاب کیتے۔ بعد اچ وزیراعظم ہونہار طلبہ غالب حسن، ماہم بتول، وریشہ ایمان تے ایمل عباس اچ لیپ ٹاپ ونڈے۔ ایں موقع تے خیبر پختونخوا پولیس دے دستے طلبہ کوں گارڈ آف آنر وی پیش کیتے۔