بہار دے وزیر اعلیٰ ولوں مسلمان خاتون دا حجاب زبردستی چھکݨ شرمناک اتے غیر انسانی حرکت اے، ترجمان دفتر خارجہ

اسلام آباد۔18دسمبر(اے پی پی) دفتر خارجہ دے ترجمان طاہر حسین اندرابی بھارتی ریاست بہار دے وزیر اعلیٰ ولوں ہک مسلمان خاتون دے نال بدسلوکی تے سخت ردعمل ݙیندے آکھیے جو ہک سینئر سیاسی رہنما ولوں خاتون دا حجاب زبردستی چھکݨ شرمناک اتے غیر انسانی حرکت اے۔ اسلام اباد اچ خمیس کوں ہفتہ وار پریس بریفنگ اچ انھاں آکھیا جو بھارت اچ اقلیتاں کوں ناروا سلوک دا سامݨا اے، بھارتی حکومت اقلیتاں دے حقوق خصوصاً مذہبی آزادی دا تحفظ یقینی بݨاوے، بھارت اچ مسلمان خاتون دے نال بدسلوکی اتے اوندا مذاق اڈاوݨ قابلِ مذمت اے، بھارت اچ مسلمان خواتین دی تذلیل کوں معمول بݨاوݨ وݙے چنتے آلی ڳالھ اے، اے واقعات بھارت اچ اسلاموفوبیا اتے عدم برداشت دی عکاسی کریندن، پاکستان اقلیتاں دے حقوق اتے انسانی وقار دے تحفظ دا مطالبہ کریندے۔ ترجمان آکھیا جو ایں واقعے توں بعد اتر پردیش اچ ہک وزیر ولوں ایں واقعے دا کھلے عام مذاق اڈایا ڳئے، اساں سارے ذمہ دار سٹیک ہولڈرز اتے بھارتی حکومت توں اپیل کریندے ہیں جو او ایں واقعے دی سنگینی کوں سمڄھے اتے اقلیتاں دے حقوق دے تحفظ، مذہبی آزادی دے احترام اتے انسانی وقار دے تحفظ کیتے اپݨا عزم ݙکھاوے۔