پاکستان اتے تاجکستان وچال صدیاں پراݨے تاریخی اتے ثقافتی روابط ہن، صدرِ مملکت آصف علی زرداری دا خطاب

اسلام آباد۔18دسمبر(اے پی پی) صدرِ مملکت آصف علی زرداری پاکستان نیشنل کونسل آف آرٹس (پی این سی اے) اچ ہفتہ ثقافت تاجکستان دی افتتاحی تقریب اچ شرکت کیتی۔ صدر آصف علی زرداری تاجکستان دی وزیر ثقافت ستوریون متلوباخون امون زودا دی قیادت اچ آوݨ والے تاجک ثقافتی وفد دا پرتپاک خیرمقدم کیتا۔ ایں موقع تے صدر دے نال تاجک وزیر ثقافت اتے وفاقی وزیر برائے قومی ورثہ و ثقافت اورنگزیب خان کھچی موجود ہن۔ صدر آصف علی زرداری آکھیا جو تاجک وفد دا اے دورہ ڈوہائیں برادر ملکاں وچال مضبوط دوستی اتے تعاون دے رشتیاں دا ثبوت اے، میکوں یقین اے جو اسلام آباد اتے لاہور اچ تاجک وفد ولوں رکھیاں ونڄݨ آلیاں ثقافتی سرگرمیاں کوں پاکستانی عوام ولوں بھرپور پذیرائی ملسی۔ انھاں تاجک وزیر ثقافت کوں چارے صوبیاں دا دورہ کرݨ اتے ہفتہ ثقافت تاجکستان دی اختتامی تقریب دی میزبانی دی دعوت ݙتی۔ صدرِ مملکت آکھیا جو ای سی او اتے شنگھائی تعاون تنظیم (ایس سی او) ڄھیاں علاقائی تنظیماں دے رکن ہووݨ پاروں پاکستان اتے تاجکستان علاقائی تعاون، روابط اتے ہم آہنگی دے وسیع تر وژن اچ وی شریک ہن۔ ایندے توں پہلے تاجک وزیر ثقافت آکھیا جو اساں سرحداں دے اعتبار نال ہمسایہ کائنی ٻھل روحانی شراکت دار ہیں، اج تھیوݨ والا ہفتہ ثقافت تاجکستان امن، تعاون اتے ثقافتی مکالمے دا سنیہا اے۔ وفاقی وزیر اورنگزیب خان کھچی صدرِ مملکت کوں خراجِ تحسین پیش کیتا اتے تاجک وفد دی آمد کوں سراہیا۔ تقریب اچ تاجک وزیر ثقافت صدرِ مملکت کوں تاجک زر دوزی کوٹ اتے تاجک ٹوپی دا تحفہ ݙتا۔ صدر آصف علی زرداری وی فارسی اشعار آلی ہک پورٹریٹ تحفہ ݙتی۔ تقریب دے چھیکڑ اچ تاجک موسیقی دے نال فنکاراں اپݨے فن دا مظاہرہ کیتا اتے روایتی ساز وڄائے ڳئے۔