بھارت دا پاݨی بطور ہتھیار استعمال کرݨ پاکستان اچ انسانی بحران پیدا کرسڳدے، نائب وزیراعظم اسحاق ڈار دی غیر ملکی سفیراں کوں بھارتی آبی جارحیت تے بریفنگ

اسلام اباد۔ 19 دسمبر(اے پی پی)نائب وزیراعظم اتے وزیر خارجہ سینیٹر اسحاق ڈار آکھیے جو بھارت دا سندھ طاس معاہدے کوں یکطرفہ معطل کرݨ عالمی قوانین دی کھلی خلاف ورزی اے، اے قدم پاکستان دی سلامتی، معیشت، عوام دی زندگی اتے جنوبی ایشیا دے امن و استحکام کیتے سنگین خطرہ اے، بھارت دا پاݨی بطور ہتھیار استعمال کرݨ پاکستان اچ انسانی بحران پیدا کرسڳدے۔ اے ڳالھ انہاں غیر ملکی سفیراں کوں بھارتی آبی جارحیت بارے بریفنگ اچ آکھی۔ نائب وزیراعظم سفارتی کور دے ممبران نال خطاب کریندے ہوئیں ایں سال ݙو موقعیاں تے دریائے چناب اچ پاݨی دے غیر معمولی اتے اچانک اتار چڑھاؤ اتے یکطرفہ اخراج تے چنتا کیتے جیڑھا جو 30 اپریل توں 21 مئی اتے 7 توں 15 دسمبر دے درمیان کیتا ڳئے۔ انہاں آکھیے جو بھارت ولوں پاݨی دے وہائو اچ تبدیلی براہ راست ساݙے شہریاں دی جان، روزگار، خوراک اتے معاشی سلامتی کیتے وݙا خطرہ اے، بھارت دا اے غیر قانونی اتے غیر ذمہ دارانہ رویہ پاکستان اچ انسانی بحران پیدا کر سڳدے۔ نائب وزیر اعظم آکھیا جو بھارت معاہدے دے تحت ضروری پہلے اطلاع، ہائیڈرولوجیکل ڈیٹا اتے سانجھی نگرانی دی فراہمی وی روک ݙتی اے جیں پاروں پاکستان کوں سیلاب اتے خشک سالی دے خطرات دا سامنا تھی ڳئے۔ انہاں بھارت ولوں بین الاقوامی قانون خاص طور تے ویانا کنونشن آن دی لا آف ٹریٹیز دے آرٹیکل 26 دی صریح خلاف ورزی کریندے معاہدے دی یکطرفہ معطلی کوں اڳونہا کیتے جو

بھارت معاہدے دے مطابق کہیں وی پہلے اطلاع یا ڈیٹا شیئرنگ دے بغیر پاݨی چھوڑیے، بھارت ولوں پاݨی اچ ردوبدل تے ساݙے انڈس واٹر کمشنر آپݨے بھارتی ہم منصب کوں خط لکھ تے وضاحت منگی اے اتے معاہدے دے تحت یکطرفہ اقدامات توں باز رہݨ دا مطالبہ کیتے۔ انہاں آکھیا اے جو بھارت کشن گنگا اتے رٹلے ڈیم جہے منصوبیاں دے ذریعے پاݨی کوں بطور ہتھیار استعمال کرݨ دی کوشش کریندا پئے، عالمی برادری سندھ طاس معاہدے دی مکمل بحالی اتے ایندے تے عملدرآمد کیتے فوری اتے اثر رکھݨ آلا کردار ادا کرے، پاکستان بھارت ولوں پاݨی روکݨ یا ایںدا رخ موڑݨ کوں “اعلانِ جنگ”سمجھیسی، بھارت معاہدے دی ذمہ داریاں پوریاں کرے اتے ایکوں کمزور کرݨ دیاں کوششاں بند کرے۔ انہاں آکھیا جو ایں سال جون اتے اگست اچ ثالثی عدالت سندھ طاس معاہدے دی حیثیت برقرار رکھی اے جیڑھی نافذ العمل اے اتے فریقین تے ایںدی پاسداری لازم اے۔ انہاں آکھیا جو پاکستان اے معاملہ کئی واری اقوام متحدہ دی سلامتی کونسل اچ چاتے اتے او آپݨے آبی حقوق تے کہیں قسم دا سمجھوتہ نہ کریسی۔