صدر مملکت آصف علی زرداری 20 توں 24 دسمبر تئیں عراق دا سرکاری دورہ کریسن

اسلام آباد۔19 دسمبر(اے پی پی)صدر مملکت آصف علی زرداری عراق دے صدر ڈاکٹر عبد اللطیف جمال رشید دی دعوت تے 20 توں 24 دسمبر تئیں عراق دا سرکاری دورہ کریسن۔ اے دورہ پاکستان اتے عراق وچال پراݨے اتے برادرانہ تعلقات دا ثبوت اے جیڑھے سانجھی مذہبی، ثقافتی اقدار اتے باہمی احترام تے کھڑن۔ دورے اچ صدر پاکستان عراقی قیادت نال اعلیٰ سطح ملاقاتاں کریسن جیندے اچ ݙو طرفہ تعلقات دے تمام پہلوواں دا جائزہ گھدا ویسی اتے باہمی دلچسپی دے اہم شعبیاں بشمول تجارت و سرمایہ کاری، توانائی، تعمیر نو، افرادی قوت، ٹیکنالوجی، تعلیم اتے عوامی رابطیاں اچ تعاون ٻیا ودھاوݨ دے طریقیاں تے غور کیتا ویسی۔ او علاقائی اتے عالمی صورتحال سودھا کثیر الجہتی فورمز تے تعاون تے وی ڳالھ مہاڑ کریسن۔ دورے اچ ݙوہاں ملکاں وچال خاص کر مذہبی سیاحت اتے اقتصادی تعاون سانڳے روایتی طور تے گرمجوش اتے دوستانہ تعلقات کوں مزید مستحکم کرݨ، شراکت داری دے نویں موقع ڳولݨ اتے عوامی رابطیاں کوں ودھاوݨ اچ مدد ملݨ دی توقع اے۔ اے سرکاری دورہ عراق نال پاکستان دی مسلسل مصروفیت ھک نتیجہ خیز اتے سٹریٹجک شراکت داری ودھاوݨ دا عزم ݙسیندی اے جیڑھا جو عراق دے استحکام و ترقی دے نال نال علاقائی امن اتے خوشحالی اچ ہتھ ونݙیسی۔