اقوامِ متحدہ دی جنرل اسمبلی اچ پاکستان دی قرارداد منظور، مقبوضہ اقوام دے حقِ خودارادیت دی توثیق

اسلام آباد۔ 19 دسمبر(اے پی پی)اقوام متحدہ دی جنرل اسمبلی پاکستان دی پیش کیتی ڳئی ھک قرارداد دی منظوری ݙے ݙتی اے، جیندے اچ نوآبادیاتی، غیر ملکی اتے ٻاہرلے قبضے دے ہیٹھ رہݨ آلی اقوام دے حقِ خودارادیت دی ولا توثیق کیتی ڳئی۔ اے قرارداد اتفاقِ رائے نال منظور کیتی ڳئی، جیندے کیتے پچھلے مہینے جنرل اسمبلی دی تریجھی کمیٹی سفارش کیتی ہئی۔ اے کمیٹی سماجی، انسانی اتے ثقافتی معاملیاں کوں ݙیہدی اے۔ پاکستان 1981 توں مسلسل اے قرارداد پیش کریندا پئے، جیندا مقصد دنیا دی توجہ انھاں قوماں دو کراوݨ اے جیڑھیاں حالی تئیں آپݨے حقِ خودارادیت کیتے جدوجہد کریندیاں پین، جنھاں اچ بھارت دے غیر قانونی زیرِ تسلط جموں و کشمیر اتے فلسطین دے عوام وی شامل ہن۔ قرارداد دے ذریعے جنرل اسمبلی ھک واری ول ایں ڳالھ تے زور ݙتے جو حقِ خودارادیت انھاں سارے حالات اچ لاگو تھیندے جتھاں اقوام ایں بنیادی حق توں محروم ہن، اتے اے اقوامِ متحدہ دے چارٹر اتے متعلقہ قرارداداں دے اصولاں دے عین مطابق اے۔ سفارتی ذرائع دے مطابق اے قرارداد حقِ خودارادیت دے حصول کیتے کوششاں کرݨ آلیاں قوماں نال عالمی یکجہتی دا ھک مضبوط اظہار اے۔ بھارت دے غیر قانونی زیرِ تسلط جموں و کشمیر دے عوام کیتے اے قرارداد انھاں دے جائز موقف، آزادی اتے وقار دی خواہشات دو عالمی توجہ کوں مزید طاقت ݙیندی اے۔ سارے خطیاں نال تعلق رکھݨ آلے 65 ملکاں دی سانجھی سرپرستی اچ پیش کیتی ڳئی ایں قرارداد اچ ملکاں کوں آکھیا ڳئے جو او فوراً ٻئے ملکاں اتے علاقیاں اچ غیر ملکی فوجی مداخلت، قبضے، جبر، امتیازی سلوک اتے ناروا سلوک دا خاتمہ کرن ۔قرارداد اچ جنرل اسمبلی غیر ملکی فوجی مداخلت، جارحیت اتے قبضے دی سخت مخالفت دا اعادہ کیتے، کیونکہ انھاں اقدامات پاروں دنیا دے مختلف حصیاں اچ قوماں دے حقِ خودارادیت اتے ٻئے انسانی حقوق دبا ݙتے ڳئن۔ اسمبلی انھاں لکھاں مہاجرین اتے بے گھر لوکاں دی حالت تے وی ارمان کیتے جیڑھے انھاں اقدامات پاروں آپݨے گھراں توں محروم تھئن، اتے انھاں دے ایں حق دی توثیق کیتی اے جو او آپݨی مرضی نال، محفوظ اتے باعزت طریقے نال آپݨے گھراں کوں واپس ول سڳن۔ آکھیا ڳئے جو انسانی حقوق کونسل غیر ملکی فوجی مداخلت، جارحیت یا قبضے پاروں تھیوݨ آلی انسانی حقوق دی خلاف ورزیاں، خاص طور تے حقِ خودارادیت دی خلاف ورزیاں تے خاص توجہ ݙیوے۔(