پاکستان ثقافتی سفارت کاری کوں ٻہوں اہمیت ݙیندے ، ڈیجیٹل میڈیا عوامی رابطے اتے مثبت بیانیے کیتے کلیدی کردار ادا کریندا پئے ،عطا اللہ تارڑ

اسلام آباد۔20دسمبر(اے پی پی)وفاقی وزیر اطلاعات و نشریات عطا اللہ تارڑ تاجکستان دے نال ڈیجیٹل میڈیا دے شعبے وچ تعاون ودھاوݨ دے عزم کوں دہرایا اے اتے آکھیا جو ڈیجیٹل میڈیا موجودہ دور وچ عوامی رابطے، ثقافتی ہم آہنگی اتے مثبت بیانیے دے ودھارے وچ وݙا کردار ادا کریندا پئے ، پاکستان ثقافتی سفارت کاری کوں ٻہوں اہمیت ݙیندے ۔ انھاں اے ڳالھ تاجکستان دی وزیرِ ثقافت ستاریون مطلوبخون امون زودہ نال ملاقات وچ آکھی، جیڑھیاں ایں ویلھے تاجک ثقافتی ہفتہ مناوݨ کیتے پاکستان دے دورے تے ہن ۔ ملاقات وچ ݙو طرفہ تعاون، ڈیجیٹل میڈیا وچ شراکت داری، میڈیا رابطیں دے ودھارے اتے ادبی و ثقافتی ورثے دے تحفظ تے ڳالھ مہاڑ تھئی۔ ݙوہیں رہنماواں پاکستان اتے تاجکستان دے درمیان ثقافتی اتے میڈیا تعاون کوں مزید ودھاوݨ تے زور ݙتا ۔وزیرِ اطلاعات پاک-تاجک ہفتہ ثقافت دے انعقاد تے تاجک وزیر کوں مبارکباد ݙیندے آکھیے جو تاجک صدر امام علی رحمان اتے وزیراعظم پاکستان محمد شہباز شریف دے درمیان ملاقات وچ اے طے تھیا ہئی اے جو پاکستان وچ تاجکستان دا ثقافتی ہفتہ منایا ویسی ۔ انھاں آکھیے جو ایجھے پروگرام ݙوہیں ملکاں دے عوام دے درمیان رابطیں کیتے مضبوط بنیاد ݙیندن ۔ انھاں آکھیا اے جو ݙوہیں ملکاں وچال صدیاں پراݨے تاریخی اتے ثقافتی رشتے ہن۔ملاقات وچ تاجکستان دے صدر دے متوقع دورہ پاکستان دے موقع تے ثقافتی تعاون ودھاوݨ کیتے باقاعدہ معاہدے کرݨ تے وی اتفاق کیتا ڳئے ۔ وفاقی وزیر آکھیے جو علامہ اقبال دی شاعری ݙوہیں ملکاں دے عوام دے درمیان فکری ہم آہنگی دی علامت اے اتے فارسی دے عظیم شاعر ݙوہیں ملکاں وچ قدر دی نگاہ نال ݙٹھے ویندن ۔ تاجک وزیرِ ثقافت تعاون تے شکریہ ادا کیتا اتے آکھیے جو تاجکستان پاکستان دے نال ڈیجیٹل میڈیا اتے ثقافتی تبادلے وچ قریبی تعاون جاری رکھیسی ایں ملاقات وچ تاجک سفیر، وزیراعظم دی کوآرڈینیٹر رومینہ خورشید عالم، سیکرٹری اطلاعات اشفاق احمد خلیل اتے ٻئے افسران وی موجود ہن