توشہ خانہ کیس کوں بلاجواز سیاسی رنگ ڈیوݨ دی کوشش کیتی ڳئی ،طلال چوہدری

فیصل آباد ۔ 20 دسمبر(اے پی پی)وزیر مملکت امور داخلہ سینیٹر طلال چوہدری آکھیے جو توشہ خانہ کیس ہک سادہ، واضح تے ثبوتاں تے مبنی معاملہ ہئی جینکوں بلاجواز سیاسی رنگ ڈیوݨ دی کوشش کیتی ڳئی اے، حالانکہ قانون اچ مقبولیت یا سیاستدان ہووݨ بے گناہی دی دلیل کائنی ہوندی بلکہ قانون ساریں کیتے برابراے ۔ لائیو سٹاک ڈیپارٹمنٹ دی تقریب دے بعد میڈیا نال ڳالھ مہاڑ کریندے انہاں آکھیا جو فیس بک، سوشل میڈیا تے عدالتی ریکارڈ خود گواہ ہن جو قیمتی تحفے، جنہاں اچ کروڑاں دی مالیت دے ہار شامل ہن، توشہ خانہ اچ جمع کراوݨ دی بجائے ذاتی استعمال اچ رکھئے ڳئن، انہاں دی گھٹ قیمت ݙسائی ڳئی تے ریاستی عہدے دا فہدہ چاتا گئے ۔ اے عمل نہ صرف قانون شکنی اے بلکہ پاکستان دی عالمی ساکھ کیتے وی نقصان دہ ثابت تھئے ۔انہاں آکھیا جو دوست ملکاں ولوں ݙتے ڳئے تحفے قومی امانت ہوندن ۔ انہاں دا غلط استعمال پاکستان کیتے شرمندگی بݨیا، جیندے اثرات اڄ وی ٻاہرلے ملک سفارتی سطح تے محسوس کیتے ویندن ۔ پر موجودہ حکومت ایں نظام کوں مکمل طور تے شفاف بݨا ݙتے ۔ ہݨ کوئی وی سرکاری تحفہ عوامی طور تے ڈسپلے کیتا ویندے، اوندی نیلامی کیمریں دے سامݨے تھیندی اے تے حاصل تھیوݨ آلی رقم فلاحی کماں، تعلیم تے صحت تے خرچ کیتی ویندی اے ۔ ہݨ کوئی حکمران یا افسر ذاتی طور تے تحفے اپݨے کنے کائنی رکھ سڳدا ۔ طلال چوہدری آکھیا جو کہیں مقدمے کوں سیاسی قرار ڈیوݨ نال جرم ختم کائنی تھیندا ۔ جے تحفہ ڳھدا ڳئے، جمع کائنی کروایا ڳیا تے اوندی غلط قیمت لوائی ڳئی تاں اے واضح جرم اے ۔ قانون اے منڳدے جو سیاستدان عام شہری توں زیادہ جوابدہ ہووے ۔انہاں ٻالاں دے ویزہ تے نادرا کارڈ بارے وضاحت کریندے آکھیا جو وزارت داخلہ دے ریکارڈ موجب اڄ تئیں کہیں قسم دی ویزہ یا نائیکوپ دی درخواست جمع ای کائنی کروائی ڳئی ۔ جے درخواست ݙتی ونڄے تاں کجھ گھنٹے اچ ویزہ جاری کیتا ونڄ سڳدے ۔ ہمدردی کارڈ کھیڈݨ دی بجائے قانونی طریقہ اختیار کیتا ونڄے ۔ انہاں جیل دی سہولتاں بارے کھنڈائی ڳئی غلط فہمیاں کوں وی رد کیتا تے آکھیا جو قید بندے کوں قانون موجب ساریاں سہولتاں ملدیاں پئن، جنہاں اچ ڈاکٹری سہولت، ذاتی سٹاف تے ملاقاتاں دی اجازت شامل اے ۔ ایندے باوجود بلاجواز پروپیگنڈا کیتا ویندا پئے ۔وزیر مملکت آکھیا جو ماضی اچ عدل دے نظام اچ سہولت کاری رہی ہئی، پر ہݨ ایویں کائنی ۔ ہݨ فیصلے ثبوتاں تے قانون دی بنیاد تے تھیندے پئن تے جیڑھا وی قانون شکنی اچ شامل اے، اوکوں ایں اوکھ نال نبݨݨا پوسی تے جواب ڈیوݨا پوسی، بھاویں او کتنا ای طاقتور یا مقبول کیوں نہ ہووے ۔ خارجہ پالیسی تے ڳالھ کریندے انہاں آکھیا جو اج پاکستان دی سفارت کاری تاریخ دی مضبوط ترین سطح تے اے ۔ چین، امریکہ، یورپ، عرب ملکاں تے خاص طور تے سعودی عرب دے نال اسٹریٹجک تے دفاعی شراکت داری پاکستان تے عالمی اعتماد دا ثبوت اے ۔ اے پاکستان دی کامیابی اے، جیڑھی وزیراعظم شہباز شریف دی قیادت اچ ممکن تھئی اے۔ انہاں واضح کیتا جو حکومت دا فوکس صرف پاکستان، ایندے عوام تے انہاں دے مسئلیں دے حل تے اے۔ احتجاج، استعفے یا دٻاؤ پاوݨ نال قانون دا رستہ کائنی بدل سڳدا جیڑھا کجھ کیتا ڳئے، اوندے نال نبݨݨا ہوسی تے حساب ڈیوݨا پوسی ۔ آخر اچ طلال بدر چوہدری لائیو سٹاک ڈیپارٹمنٹ دے کماں تے اعلیٰ افسران دی کارکردگی دی تعریف کیتی تے آکھیا جو عوامی خدمت دے منصوبے ای اصل سیاست ہن تے حکومت ایں پاسے کم جاری رکھیسی ۔