وزیراعظم شہباز شریف دی زیر صدارت انسانی سمگلنگ مکاوݨ تے غیر قانونی طور تے ٻاہرلے ملکاں دے سفر دے خلاف اقدامات تے جائزہ اجلاس

لاہور ۔20 دسمبر(اے پی پی)وزیراعظم محمد شہباز شریف انسانی سمگلنگ مکاوݨ کیتے متعلقہ اداریں دی کوششاں دی تعریف کریندے آکھیے جو غیر قانونی طور تے ٻاہرلے ملکاں ونڄݨ آلیں تے مشکوک سفری دستاویزات رکھݨ آلیں دے خلاف کارروائی اچ ایں ڳالھ دا خاص خیال رکھا ونڄے جو معتبر سفری دستاویزات رکھݨ آلے مسافر ایندے توں متاثر نہ تھیون ۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی زیر صدارت انسانی سمگلنگ مکاوݨ تے غیر قانونی طور تے ٻاہرلے ملکاں سفر دے خلاف اقدامات تے جائزہ اجلاس تھیا ۔اجلاس اچ وفاقی وزیر داخلہ محسن نقوی، وفاقی وزیر قانون و انصاف اعظم نذیر تارڑ، وفاقی وزیر اقتصادی امور احد خان چیمہ، وفاقی وزیر اطلاعات و نشریات عطا اللہ تارڑ، وزیر مملکت داخلہ طلال چوہدری تے متعلقہ اعلیٰ افسران شرکت کیتی ۔ وزیراعظم انسانی سمگلنگ مکاوݨ کیتے متعلقہ اداریں دے کماں دی پذیرائی کیتی ۔ انہاں آکھیا جو پردیس ونڄݨ آلے مسافریاں دی آف لوڈنگ دے حوالے نال اڄوکی اطلاعات تے شکایتاں تے وفاقی وزیر داخلہ خود ایئرپورٹس تے ونڄ تے صورتحال دا جائزہ ڳھدا جیڑھا ٻہوں لائق تحسین کم اے۔وزیراعظم ہدایت کیتی جو غیر قانونی طور تے ٻاہرلے ملکاں دا سفر کرݨ آلیں تے مشکوک سفری دستاویزات رکھݨ آلیں دے خلاف کارروائی اچ ایں ڳالھ دا خاص خیال رکھا ونڄے جو معتبر سفری دستاویزات رکھݨ آلے مسافر متاثر نہ تھیون۔ انہاں پروٹیکٹوریٹ آف ایمیگرینٹس دی کارکردگی ٻئی بہتر بݨاوݨ تے وفاقی تحقیقاتی ادارہ (ایف آئی اے) تے ٻئے متعلقہ اداریں نال ہم آہنگی ودھاوݨ دی ہدایت کیتی تاں جو قانونی طور تے ٻاہرلے ملک نوکری کیتے ونڄݨ آلیں کوں سفر دے دوران کہیں اوکھ دا سامݨا نہ کرݨا پووے ۔ انہاں آکھیا جو امیگریشن دا نظام بہتر بݨاوݨ کیتے ٹیکنالوجی دا بھرپور استعمال ویلھے دی اہم لوڑھ اے۔ انہاں بدعنوان (کرپٹ) عناصر دے خلاف سخت کارروائی دی ہدایت وی کیتی ۔اجلاس کوں ٻاہرلے ملک غیر قانونی ونڄݨ آلیں دے خلاف کارروائیاں تے اقدامات تے بریفنگ ݙتی ڳئی ۔ اجلاس کوں ݙسایا ڳیا جو ایف آئی اے ایں سال انسانی سمگلنگ تے ٻاہرلے ملک غیر قانونی سفر دے کاروبار اچ ملوث 451 لوکاں کوں گرفتار کیتے، متعلقہ اداریں دی کارروائی نال یورپ دا غیر قانونی سفر کرݨ آلے پاکستانیاں دی تعداد اچ 47 فیصد کمی آئی اے، ایویں ای برطانیہ تے خلیجی ملکاں اچ غیر قانونی دستاویزات تے سفر کرݨ آلیں دی تعداد وی گھٹ تھئی اے۔ یورپی ملکاں اچ غیر قانونی ہجرت، ورک ویزہ، وزٹ تے ٹورسٹ ویزہ دا غلط استعمال، آف لوڈنگ تے ڈی پورٹیشن دی وݙی وجہ اے، زیادہ تر مسافر سعودی عرب، متحدہ عرب امارات، عراق، ملائیشیا تے عمان توں ڈی پورٹ تھئن ۔اجلاس کوں ٻیا ݙسایا ڳیا جو ایف آئی اے اچ رسک اسیسمنٹ یونٹ کم کریندا پئے جیندے نال مسافراں دی ٹارگٹڈ سکریننگ کیتی ویندی اے تے ڈی پورٹ تھیوݨ آلیں تے غیر قانونی سفر کرݨ آلیں دا ڈیٹا سسٹم اچ شامل کیتا ویندے۔ اجلاس کوں ݙسایا ڳیا جو ایف آئی اے، اے این ایف تے ٻئے متعلقہ اداریں اچ بدعنوانی دے حوالے نال زیرو ٹالرینس اے، ایف آئی اے اچ کرپشن ثابت تھیوݨ تے 196 اہلکاراں تے اعلیٰ افسران کوں نوکری توں برخاست کیتا ڳئے ۔ اجلاس کوں ݙسایا ڳیا جو ایئرپورٹس تے ای-گیٹس دا نظام فعال کرݨ تے کم جاری اے۔ ایندے توں علاوہ اے پی آئی-پی این آر دے ڈیٹا تئیں رسائی ممکن بݨائی ویسی تاں جو مشکوک دستاویزات پہلے توں ای دستیاب ہوون ۔ مسافراں دے ڈیٹا کیتے موبائل ایپ بݨائی ویندی پئی اے، ایف آئی اے دے آئی بی ایم ایس تے آئی ٹی سیکشنز دی ری سٹرکچرنگ تھیندی پئی اے، تے غیر قانونی سفر روکݨ کیتے مصنوعی ذہانت (AI) دا استعمال کیتا ویندا پئے۔