قوماں نعریں نال نی بلکہ انسانی ہمدردی نال سنڄاتیاں ویندن ، مریم نواز

لاہور۔20 دسمبر(اے پی پی)وزیراعلیٰ پنجاب مریم نواز عالمی یومِ انسانی یکجہتی تے اپݨے پیغام اچ آکھیے جو انسانی یکجہتی اتھوں شروع تھیندی اے جتھاں ریاست کمزور کوں کلہا چھوڑݨ توں انکار کر ݙیوے ۔قوماں نعریں نال نی بلکہ انسانی یکجہتی تے کمزور دے نال کھڑے تھیوݨ نال سنڄاتیاں ویندن ۔ جئیں معاشرے اچ ہک بندہ وی کلہا رہ ونڄے، اتھاں ترقی تے یکجہتی ادھوری ہوندی اے۔ وزیراعلیٰ آکھیا جو پنجاب حکومت ہر طبقے کوں نال گھن تے چلدی پئی اے تے ریاست ہر کمزور کیتے ماء وانڳوں اے۔انہاں آکھیا جو سالاں بعد بہترین پالیسیاں نال ریاست تے عوام وچال ہمدردی دا رشتہ تکڑا تھیندا پئے۔ پنجاب اچ جنہاں کنے اپݨے گھر کائنی ، انہاں کوں گھر ملدے پئن، تے جیڑھے محفوظ کائنی انہاں کوں محفوظ بݨایا ویندا پئے۔ تعلیم، صحت تے سماجی تحفظ دے منصوبے انسانی یکجہتی دے عملی نمونے ہن ۔ انہاں آکھیا جو پنجاب حکومت دی ہر پالیسی دا مرکز انسان، اوندی عزت تے اوندا حق اے۔ پنجاب اچ خدمت کوں سیاست نی بلکہ ذمہ واری سمجھیا ویندا پئے جیڑھی محبت کوں ودھارا ݙیندی پئی اے۔