پی ٹی آئی دے بانی ݙوجھیں تے کرپشن دے الزام لاتے تے خود بدعنوانی اچ ملوث رہین ، رانا ثناء اللہ خان

اسلام آباد۔20 دسمبر(اے پی پی)وزیراعظم دے مشیر سیاسی و عوامی امور سینیٹررانا ثناء اللہ خان آکھیے جو اسلام آباد دی خصوصی عدالت توں توشہ خانہ ٹو کیس اچ پی ٹی آئی دے بانی کوں سݨائی ڳئی سزا مکمل طور تے دستاویزی ثبوتاں تے مبنی اے۔ نجی ٹی وی نال ڳالھ مہاڑ کریندے انہاں آکھیا جو عدالت ایں ڳالھ دی تصدیق کیتی اے جو سابق چیئرمین پی ٹی آئی قانون دی خلاف ورزی کیتی اے۔ انہاں آکھیا جو پی ٹی آئی دے بانی قیمتی تحفیں کوں ڄاݨ ٻُجھ تے گھٹ قیمت ݙسایا تاں جو انہاں کوں اصل مالیت توں ٻہوں گھٹ قیمت تے ڳھدا ونڄ سڳے، جیندے نتیجے اچ قومی خزانے کوں مالی ضیان پڄے ۔انہاں آکھیا جو ریکارڈ اچ رد و بدل توں گھن تے قیمت دے غلط اندازے تئیں ہر قدم قانونی اصولاں دے خلاف ہا تے عدالت دا فیصلہ انہاں تمام خلاف ورزیاں دی عکاسی کریندے ۔ رانا ثناء اللہ پی ٹی آئی دے بانی تے تنقید کریندے آکھیا جو او سالاں تئیں قوم کوں ایمانداری دا درس ݙیندا رہیے تے ݙوجھیں تے کرپشن دے الزام لیندے رہین۔ انہاں آکھیا جو اڄ دا عدالتی فیصلہ ایں ڳالھ دا ثبوت اے جو او خود وی ایں اوکھ تے بدعنوانی اچ ملوث رہین جیڑھا انہاں دے قول تے فعل دے تضاد کوں ظاہر کریندے ۔ ایں سارے معاملے نال نبݨݨ کیتے قانون اپݨا رستہ بݨا ڳھدے۔