حجاب کھسݨ دا واقعہ، وزیراطلاعات و نشریات عطا اللہ تارڑ دی بھارت دے اخلاقی دیوالیہ پن تے انتہا پسندی دی مذمت

اسلام آباد، 20 دسمبر(اے پی پی)وفاقی وزیراطلاعات و نشریات عطا اللہ تارڑ ریاست بہار اچ حجاب کھسݨ دے واقعے تے بھارت کوں کڑی تنقید دا نشانہ بݨیندے اینکوں ودھدے ہوئے اسلامو فوبیا تے عدم برداشت دا عکس قرار ݙتے ۔ وی نیوز انگلش کوں ݙتے ڳئے ہک انٹرویو اچ وزیر اطلاعات و نشریات عطاءاللہ تارڑ آکھیا جو ہک ٻہوں افسوسناک واقعہ سامݨے آئے، جیندے اچ ہک مسلمان میڈیکل گریجویٹ کوں مبینہ طور تے نقاب لہاوݨ تے مجبور کیتا ڳئے۔ انہاں آکھیا جو بھارت “اخلاقی دیوالیہ پن، شدید پولرائزیشن تے پرتشدد انتہا پسندی دا شکار اے،تے ہک سینئر سیاسی رہنما دا ایسا طرز عمل انتہائی قابل مذمت اے۔انہاں ایں واقعے کوں اسلامو فوبیا دی ودھدی لہر دی علامت قرار ݙتا ، جیندی بنیاد پروپیگنڈا تے بھن تروڑ تے پیش کیتے ڳئے بیانیے تے ہے۔ انہاں نوٹ کیتا جو دفتر خارجہ ایں واقعے دی باضابطہ مذمت کیتی اے، جیندے بعد اسلام آباد دی طرفوں سفارتی ردعمل سامݨے آئے۔ انہاں دا آکھݨ ہئی جو ایں قسم دے فعل دا کوئی جواز نی تھی سڳدا۔ انہاں ٻیا آکھیے جو ایجھے واقعیں کوں کلہا کر تے نی ݙیکھݨا چاہیدا، کیوں جو اے اکثر منظم پروپیگنڈے تے ڈیجیٹل پلیٹ فارمز دے ذریعے کھنڈائے ونڄݨ آلے مسخ شدہ بیانیے نال جڑئے ہوندن ۔وزیر اطلاعات آکھیا جو پاکستان کوں بھارت ولوں مسلسل ‘انفارمیشن وارفیئر’ (معلوماتی جنگ) دا سامݨا اے، خاص طور تے ݙوہائیں ایٹمی پڑوسیاں دے درمیان تناؤ دے دوران انہاں اڄوکے سال دے شروع اچ تھیوݨ آلے تصادم (جینکوں پاکستان “معرکہ حق” دا ناں ݙتے) دا حوالہ ڈیندے آکھیا جو معلومات دا شعبہ ہک اہم میدانِ جنگ بݨ تے ابھرئے۔ انہاں بھارت تے پاکستان دے طریقے دا موازنہ کریندے آکھیا جو بھارت دا رویہ، بھارتی میڈیا تے آن لائن ذرائع توں کوڑے تے گمراہ کن دعوے کیتے ڳئے، جیندے نال نویں دہلی دی بین الاقوامی ساکھ کوں نقصان پڄے۔ پاکستان تصدیق شدہ معلومات دی ویلھے تے فراہمی تے توجہ ݙتی اے۔ وزیراعظم ہاؤس، وزارت خارجہ، وزارت اطلاعات تے آئی ایس پی آر دے درمیان مکمل ہم آہنگی رہی اے۔عطا اللہ تارڑ ݙسایا جو جݙاں بھارتی حکام پاکستانی یوٹیوب چینلز تے پابندی لاتی تاں پاکستان بھارت دے اندر ڈیجیٹل اشتہاراں دا سہارا ڳھدا تاں جو پاکستانی مواد بھارتی عوام تئیں سدھا پڄ سڳے۔ انہاں آکھیا جو حکومت “فیک نیوز بسٹر” سوشل میڈیا اکاؤنٹس تے ہک خاص ویریفیکیشن سیل بݨائے جیہڑھا کوڑے مواد دی نشاندہی تے اوندی تصحیح کریندے ۔وزیر اطلاعات آکھیا جو حکومت پاکستان دا پہلا آفیشل ڈیجیٹل کمیونیکیشن ڈیپارٹمنٹ بݨائے جیڑھا ہک “نرو سینٹر” دے طور تے کم کریندے ۔ اے محکمہ بیانیے دی نگرانی، پیغام رسانی اچ ہم آہنگی تے کہیں وی اوکھ یا بحرانی صورتحال اچ تصدیق شدہ معلومات دی فوری ترسیل دا ذمہ وار اے۔ انہاں آکھیا جو پاکستان اسلامو فوبیا تے ڈیجیٹل پروپیگنڈا جیھے چیلنجز نال نبݨݨ کیتے اقوام متحدہ تے او آئی سی جیھے عالمی پلیٹ فارمز تے اے آواز چیندا رہسی تاں جو سوشل میڈیا کمپنیاں دے احتساب تے بین الاقوامی تعاون کوں یقینی بݨایا ونڄ سڳے۔