خاتونِ اول آصفہ بھٹو زرداری دا شہید بینظیر آباد اچ سڑکاں دے منصوبیں دا افتتاح کرݙتا

شہید بینظیر آباد۔21 دسمبر(اے پی پی)خاتونِ اول آصفہ بھٹو زرداری شہید بینظیر آباد اچ سڑکاں دے منصوبیں دا افتتاح کر ݙتے ۔ خاتونِ اول سلطان موری تے کرنل موری دے نیڑے سڑکاں دی بحالی تے توسیعی منصوبیں دا افتتاح کیتا ۔ انہاں مہران ہائی وے باندھی توں سٹھ میل تے کرنل موری اچ 3 چک روڈ دے بحالی منصوبیں دا وی افتتاح کیتے۔ شہید بینظیر آباد اچ سڑکاں دی بحالی تے توسیع دے حوالے نال ڳالھ مہاڑ کریندے خاتونِ اول آصفہ بھٹو زرداری آکھیا جو انہاں منصوبیں دا مقصد علاقائی رابطہ بہتر کرݨا تے مقامی لوکاں دی آونڄ کوں سوکھا بݨاوݨ اے۔مہران ہائی وے نال جڑی 27 کلومیٹر سڑک 738 ملین روپے دی لاڳت نال مکمل کیتی ڳئی اے۔ ایگزیکٹو انجینئر صوبائی ہائی وے شہید بینظیر آباد عاصم علی ابڑو خاتونِ اول کوں منصوبیں بارے بریفنگ ݙتی ۔ بریفنگ اچ ݙسایا ڳیا جو باندھی سلطان موری روڈ توں چک 3 تئیں سڑک دی بحالی دا منصوبہ آخری مرحلے اچ ہے، 17 کلومیٹر لمبی اے سڑک 13 وستیاں دی تقریباً 12 ہزار آبادی کوں فیدہ ݙیسی ۔ ایں منصوبے دی قیمت 335.154 ملین روپے ہے۔ مہران ہائی وے باندھی توں سٹھ میل تے کرنل موری اچ 3 چک روڈ تئیں تے سلطان موری سڑک دی بحالی دا منصوبہ مکمل تھی چکیے، جیڑھا 27 کلومیٹر لمبا اے تے 738.479 ملین روپے دی لاڳت نال بݨیا ۔آصفہ بھٹو زرداری آکھیا جو دیہاتی علاقیں اچ رابطہ سڑکاں دی بہتری پیپلز پارٹی دی ترجیح اے۔ شہید بینظیر بھٹو دا وژن پسماندہ تے دیہاتی علاقیں کوں ترقی دے مرکز اچ گھن آوݨ ہئی۔ سڑکاں نہ صرف سفر سوکھا بݨیندن بلکہ تعلیم، صحت تے معاشی کماں کوں وی ودھیندن ۔ انہاں منصوبیں توں 39 ہزار لوک فیدہ چیسن تے کساناں کوں منڈیاں تئیں رسائی اچ وݙی سہولت ملسی