پاکستان تے چین وچال ڈیجیٹل تعاون کیتے 24 ٹیکنالوجی معاہدیں تے دستخط تھئن

اسلام آباد۔21 دسمبر(اے پی پی)پاکستان تے چین آئی ٹی تعاون کیتے جوائنٹ ورکنگ گروپ دے تحت ڈیجیٹل اشتراک کوں تکڑا بݨاوݨ کیتے 24 مفاہمتی یادداشتاں تے دستخط کرتے تکنیکی تعاون کوں ٻئی وسعت ݙتی اے۔ بیجنگ اچ تھیوݨ آلے انھاں معاہدیں اچ ہک سرکاری سطح تے، ست حکومت تے کاروباری اداریں وچال تے 16 کاروبار توں کاروبار (B2B) معاہدے شامل ہن ۔ ایں قدم دا مقصد آئی ٹی دی صنعت اچ تعاون ودھاوݨ کیتے ہک جدید ڈیجیٹل کوریڈور بݨاوݨ اے۔اے ڈیجیٹل کوریڈور پاکستانی ٹیکنالوجی کمپنیاں کیتے نویں موقع پیدا کریسی تے انفراسٹرکچر دی ترقی اچ مدد ݙیسی، جیندے اچ سائبر سکیورٹی، مصنوعی ذہانت (AI) تے ڈیجیٹل مہارت شامل ہن ۔ وزارت آئی ٹی 3 لکھ پاکستانی نینگراں کوں جدید ڈیجیٹل مہارت دی تربیت ݙیوݨ کیتے سرگرم اے۔ گوگل دے نال ہک خاص شراکت داری دے تحت اعلیٰ افسران کوں وی “اے آئی” دی تربیت ݙتی ویسی تاں جو سرکاری شعبیں دی کارکردگی بہتر تھیوے ۔ ایندے توں علاوہ ایشیائی ترقیاتی بینک تے ZTE دے نال رل تے وی لکھاں نینگراں کوں ہنرمند بݨایا ویندا پئے تاں جو او مستقبل دی ہر اوکھ نال نبݨݨ دے قابل تھی سڳن۔