سپیکر قومی اسمبلی ایاز صادق دی انڈر 19 ایشیا کپ جِتݨ تے قومی ٹیم کوں مبارخ

اسلام آباد۔21 دسمبر(اے پی پی)سپیکر قومی اسمبلی سردار ایاز صادق قومی انڈر 19 کرکٹ ٹیم کوں ایشیا کپ 2025 جِتݨ تے مبارخ ݙیندے آکھیے جو بھارت دے خلاف اے شاندار فتح نینگراں دی محنت تے جذبے دی عکاسی کریندی اے۔ قومی اسمبلی سیکرٹریٹ توں جاری بیان اچ انہاں چیئرمین پی سی بی سید محسن رضا نقوی، اعلیٰ افسران، ٹیم مینجمنٹ تے کوچنگ سٹاف کوں وی مبارخ ݙتی تے قومی ٹیم کیتے نیک خواہشات دا اظہار کیتے۔سردار ایاز صادق آکھیا جو قومی انڈر 19 ٹیم فائنل اچ روایتی حریف بھارت کوں شکست ݙے تے ایشیا کپ اپݨے ناں کیتے ، پورے ٹورنامنٹ اچ ٹیم دی کارکردگی ٻہوں چنڳی تے تسلسل نال رہی اے جیڑھی قابلِ تحسین اے۔ انہاں آکھیا جو قومی ٹیم ایشیا کپ جِت تے ملک تے قوم دا ناں روشن کیتے پاکستان دے نینگراں اچ غیر معمولی صلاحیتاں ہن تے او ملک دا روشن مستقبل ہن ۔ سپیکر آکھیا جو کھݙاریاں دا ٹیم ورک، حوصلہ تے کھیݙ اچ ہر قسم دی اوکھ نال نبݨݨ دا پیشہ ورانہ انداز قابلِ ستائش اے۔