وزیراعظم دا ایشیا کپ جِتݨ آلی انڈر 19 ٹیم دے ہر کھڈاری کیتے ہک ہک کروڑ روپے انعام دا اعلان

اسلام آباد۔22 دسمبر(اے پی پی)وزیراعظم محمد شہباز شریف انڈر 19 ایشیا کپ جِتݨ والی پاکستان کرکٹ ٹیم دے ہر کھڈاری کیتے ہک ہک کروڑ روپے دا اعلان کریندے آکھیے جو ٹیم قوم دا سر ماݨ نال اچا کر ݙتے۔ اے ڳالھ انہاں اسلام اباد اچ انڈر نائنٹین ٹیم کوں ݙتے ڳئے ظہرانے نال خطاب اچ آکھی۔

ایں موقع تے وفاقی وزیرِ داخلہ و چیئرمین پی سی بی محسن نقوی، وزیرِ اطلاعات عطاء اللہ تارڑ اتے ٻئے اعلیٰ افسران وی موجود ہن۔ وزیراعظم ٹیم کوں شاندار جیت تے شاباش ڈتی اتے آکھیے جو ٹیم، انتظامیہ اتے محسن نقوی دی محنت رنگ ڳھن لائی اے۔ وزیراعظم علی رضا اتے سمیر منہاس دی کارکردگی دی تعریف کیتی اتے ٹیم دے ہر کھڈاری کیتے ہک ہک کروڑ روپے اتے ٹیم مینجمنٹ دے ہر ممبر کیتے 25، 25 لکھ روپے انعام دا اعلان کیتے۔

چیئرمین پی سی بی محسن نقوی آکھیا جو انڈر 19 ٹیم دی جیت ساݙے کیتے ہک تاریخی موقع اے، ٹیم دے کھڈاریاں کیتے انعام دے اعلان تے وزیراعظم دا شکریہ ادا کرینداں، کھݙ اچ جیہڑے وی اوکھ سامݨے آئن، کوچز دی محنت پاروں اساں اوندے نال کامیابی نال نبݨݨ اچ سرخرو رہے ہی۔