فیلڈ مارشل سید عاصم منیر دی ایشیا کپ جِتݨ والی پاکستان انڈر 19 کرکٹ ٹیم نال ملاقات

راولپنڈی۔22 دسمبر(اے پی پی)چیف آف ڈیفنس فورسز اتے چیف آف آرمی سٹاف فیلڈ مارشل سید عاصم منیر نال پاکستان انڈر 19 کرکٹ ٹیم جی ایچ کیو راولپنڈی اچ ملی۔ آئی ایس پی آر دے مطابق ملاقات اچ فیلڈ مارشل ایشیا کپ انڈر 19 جِتݨ دے تاریخی معرکے اچ شاندار کارکردگی تے کھڈاریاں، ٹیم مینجمنٹ اتے اعلیٰ افسران کوں مبارک ݙتی۔ انہاں ٹیم دے نظم و ضبط اتے لڑݨ دے جذبے دی تعریف کریندے ایں کامیابی کوں قوم کیتے ماݨ دی ڳالھ قرار ݙتے۔ فیلڈ مارشل نینگراں دی محنت کوں سراہیا اتے زور ڈتے جو اے کامیابی پاکستان دے نینگراں اچ لُکے ہوئے ٹیلنٹ دی عکاس اے۔ انہاں کھڈاریاں دی حوصلہ افزائی کیتی جیڑھے مستقبل اچ وی پیشہ ورانہ مہارت دے نال میدان اچ اتے ٻاہرو ملک دے بہترین سفیر ٻݨ تے اٻھرسن۔ فیلڈ مارشل آکھیا جو پاکستان دے نینگر ملک دے مستقبل دی بنیاد ہین، جنھاں دا کردار ہی عالمی سطح تے ملک دا مقام ٻݨیسی، نینگراں کوں بااختیار بݨاوݨ نال ای او قومی تعمیر و ترقی اچ اپنا حصہ پا سگسن۔ انڈر 19 ٹیم دے کھڈاریاں فیلڈ مارشل ولوں حوصلہ افزائی تے انھاں دا شکریہ ادا کیتے اتے آکھیے جو کھیل اچ جیہڑی وی اوکھ پیش آئی، اوندے نال نبݨݨ اچ آرمی چیف دی اے پذیرائی انھاں کیتے ودھ محنت کرݨ دا جذبہ پیدا کریسی۔