پاکستان دی ترقی تے خوشحالی کیتے سیاسی جماعتاں اچ ہم آہنگی ضروری اے، پی آئی اے دی شفاف نجکاری کیتے ٻولی دا عمل براہِ راست ݙکھاوݨ دا فیصلہ کیتے، وزیراعظم شہباز شریف

اسلام آباد۔ 23 دسمبر (اے پی پی)وزیراعظم محمد شہباز شریف سیاسی جماعتاں وچال ہک واری ول مذاکرات دی لوڑھ تے زور ݙیندے آکھیے جو پاکستان دی ترقی تے خوشحالی کیتے سیاسی جماعتاں اچ ہم آہنگی ضروری اے پر مذاکرات دی آڑ اچ بلیک میلنگ کائناں چلسی ۔ شفافیت کوں سامݨے رکھیندے پی آئی اے دی نجکاری کیتے ٻولی دا عمل براہِ راست ݙکھاوݨ دا فیصلہ کیتا ڳئے۔ وفاقی کابینہ دے اجلاس دے دوران اپݨے ابتدائی کلمات اچ وزیراعظم انڈر 19 ایشیا کپ اچ قومی کرکٹ ٹیم دی شاندار کارکردگی دی تعریف کیتی تے ٹیم کوں ایں کامیابی تے مبارخ ݙتی۔وزیراعظم وفاقی کابینہ کوں ݙسایا جو اڄ پی آئی اے دی نجکاری دا ݙینھ اے ، ٻولی دے عمل کوں شفاف بݨاوݨ کیتے یکسوئی نال کم کیتا ڳئے تے ایں عمل کوں براہِ راست نشر کرݨ دا فیصلہ کیتے۔ حکومت درپیش چیلنجز تے اوکھ نال نبݨݨ کیتے تندہی نال کم کریندی پئی اے ۔ نجکاری کیتے نائب وزیراعظم، وزیرِ دفاع تے وزیرِ خزانہ بہترین کوششاں کیتن، پی آئی اے دی نجکاری کیتے متعلقہ حکام تے کابینہ ممبران وی ٻہوں محنت نال نال کم کیتے۔ وزیراعظم آکھیے جو سربمہر لفافیں اچ ٻولی دا عمل براہِ راست ݙکھایا ویندا پئے ۔ وزیراعظم آکھیے جو ملک دی تاریخ دی ساریں توں وݙی نجکاری تھیوݨ ویندی پئی اے، ایں معاملے تے وفاقی کابینہ اچ ساریں دی صلاح ڳھدی ویسی۔ وزیراعظم سعودی عرب دی طرفوں فیلڈ مارشل سید عاصم منیر کوں سعودی عرب دے ساریں توں وݙے اعزاز “کنگ عبدالعزیز ایوارڈ” نال نوازیے ونڄݨ تے مبارخ ݙیندے آکھیے جو اے ایوارڈ صرف انھاں دا نی بلکہ پوری قوم کیتے اعزاز دی ڳالھ اے ۔پی ٹی آئی ولوں مذاکرات دی ڳالھ تے اظہارِ خیال کریندے وزیراعظم آکھیے جو انھاں پی ٹی آئی کوں اسمبلی دے فلور توں وی مذاکرات دی دعوت ݙتی ہئی، جے او تیار ہن تاں حکومت وی مذاکرات کیتے تیار اے۔ سیاسی جماعتاں اچ مذاکرات تے ہم آہنگی پاکستان دی ترقی تے خوشحالی کیتے ضروری اے پر مذاکرات دی آڑ اچ بلیک میلنگ نی تھیوݨی چاہیدی ۔ ملک کوں اڳوں چلݨا چاہیدے تے ایندے کیتے حکومت ہراقدام چاوݨ سانڳے تیار اے۔ ایں اجلاس اچ ݙوہیں اہم امور تے غور کیتا ڳئے تے اعلیٰ افسران وی موجود ہن جیڑھے ٻئے معاملیں تے وی بریفنگ ݙیندے پئن