پی آئی اے دے 75 فیصد حصص دی وکامت سانڳے ٻولی دا پہلا مرحلہ مکمل

اسلام آباد۔23 دسمبر(اے پی پی)پاکستان انٹرنیشنل ایئر لائنز کارپوریشن لمیٹڈ (پی آئی اے) دے 75 فیصد حصص دی وکامت کیتے ٻولی دے عمل دا پہلا مرحلہ مکمل تھی ڳئے ۔ نجکاری کمیشن دے زیرِ اہتمام پی آئی اے دی نجکاری کیتے ترائے کنسورشیم ٻولیاں جمع کروا ݙتیاں ہن۔ پہلے کنسورشیم اچ لکی سیمنٹ لمیٹڈ، حب پاور ہولڈنگز لمیٹڈ، کوہاٹ سیمنٹ لمیٹڈ تے میٹرو وینچرز شامل ہن۔ ݙوجھے کنسورشیم اچ عارف حبیب کارپوریشن، فاطمہ فرٹیلائزر، سٹی اسکولز پرائیویٹ لمیٹڈ تے لیک سٹی ہولڈنگز شامل ہن جݙاں جو تریجھے کنسورشیم اچ ایئر بلیو پرائیویٹ لمیٹڈ شامل اے ۔ ٻولی ݙیوݨ آلے کنسورشیمز دے نمائندے ہک ہک کرتے اڳوں آئے تے براہِ راست نشر تھیوݨ آلی عوامی تقریب اچ شفاف ڈٻے اچ اپݨی سیل بند ٻولیاں جمع کرائیاں، ترائے کنسورشیم ولوں ݙتیاں ڳئیاں ٻولیاں اڄ تریجھے پہر 3 وڄ تے 30 منٹ تے کھولیاں ویسن، ایں موقع تے ٻولیاں تے ریفرنس قیمتاں دا اعلان کیتا ویسی تے طے شدہ شرائط موجب ٻولی دے عمل کوں مکمل کیتا ویسی۔ وزیراعظم دے مشیر نجکاری محمد علی میڈیا نال ڳالھ مہاڑ اچ آکھیے جو انشاء اللہ اساکوں چنڳی ٻولی ملسی، چنڳی سرمایہ کاری آسی تے ایں عمل اچ اساں کامیاب تھیسوں۔