وزیراعظم شہبازشریف نال یو اے ای دے سفیر سالم محمد سالم البواب الزابی دی ملاقات

اسلام آباد۔ 23 دسمبر (اے پی پی)وزیراعظم محمد شہباز شریف پاکستان تے متحدہ عرب امارات وچال پراݨے تے بھرپی آلے تعلقات دی تعریف کریندے آکھیے جو ݙوہیں ملکاں دے تعلقات کئی ݙہاکیں توں سانجھے احترام، دوستی تے نیڑے تعاون تے مبنی ہن، امارات دے صدر شیخ محمد بن زاید النہیان دے دورہ پاکستان دے منتظر ہیسے۔ اے ڳالھ انہاں پاکستان اچ متحدہ عرب امارات دے سفیر سالم محمد سالم البواب الزابی نال ڳالھ مہاڑ کریندے آکھی جنھاں اتھاں وزیراعظم ہاؤس اچ انھاں نال ملاقات کیتی۔ وزیراعظم دفتر دے میڈیا ونگ توں جاری بیان موجب ملاقات اچ وزیراعظم دے معاونِ خصوصی طارق فاطمی تے سیکرٹری خارجہ آمنہ بلوچ وی موجود ہن۔ وزیراعظم امارات دے سفیر دا پرتپاک خیرمقدم کریندے انھاں کوں پاکستان اچ انھاں دی اڄوکی تقرری تے مبارخ ݙتی ۔وزیراعظم پاکستان تے متحدہ عرب امارات وچال پراݨے تے بھرپی دے تعلقات دی تعریف کریندے آکھیے ݙوہیں ملکاں دے تعلقات کئی ݙھاکیں توں سانجھے احترام، دوستی تے نیڑے تعاون تے مبنی ہن۔ وزیراعظم متحدہ عرب امارات دی قیادت کیتے نیک تمناواں تے خیرسگالی دے جذبات دا اظہار کریندے آکھیے جو او متحدہ عرب امارات دے صدر تے ابوظہبی دے حکمران شیخ محمد بن زاید النہیان دے دورہ پاکستان دے منتظر ہن۔ وزیراعظم ݙوہیں ملکاں وچال ݙوطرفہ تجارت دے حجم تے اطمینان کریندے ایں ڳالھ تے زور ݙتا جو اقتصادی تعلقات کوں ٻیا ودھاوݨ، تجارت تے سرمایہ کاری دے موقع ودھاوݨ دے نال توانائی، معدنیات، آئی ٹی، ریلوے تے ہوا بازی جیھے شعبیں اچ تعاون کوں ٻئی وسعت ڈیوݨ دی لوڑھ اے۔وزیراعظم پاکستان تے متحدہ عرب امارات دے تعلقات کوں ٻیا تکڑا بݨاوݨ کیتے پاکستان دے پکے عزم دا اعادہ کریندے پاکستان دی اقتصادی ترقی تے استحکام کیتے اہم شعبیں اچ یو اے ای کوں سرمایہ کاری دی دعوت ݙتی اے۔ انھاں اوکھے ویلھے اچ پاکستان کیتے متحدہ عرب امارات دی مسلسل حمایت بشمول انسانی ہمدردی دی بنیاد تے امداد تے ترقیاتی منصوبیں دی وی تعریف کیتی ۔سفیر سالم محمد سالم البواب الزابی وزیراعظم دا شکریہ ادا کیتا تے متحدہ عرب امارات دے صدر شیخ محمد بن زاید النہیان ولوں نیک خواہشات تے خیرسگالی دا سنھیا پُڄایا۔ انھاں پاکستان دے نال سارے شعبیں اچ شراکت داری کوں ٻیا گھاٹا کرݨ کیتے متحدہ عرب امارات دے پختہ عزم دا اعادہ کیتا تے وزیراعظم کوں یقین ݙیوایا جو او ݙوہیں ملکاں دے سانجھے مفاد اچ تعاون دے نویں موقع ڳولݨ سانڳے بھرپورکوشش کریسن۔ ایں سلسلے اچ جیڑھا وی نواں کم شروع تھیسی، او وقتی سامݨے آسی۔