پاکستان اچ معاشی استحکام، اصلاحات تے پالیسیاں دے تسلسل توں ملکی تے عالمی سطح تے اعتماد بحال، معیشت برآمدات تے مبنی ترقی دی پاسے ودھدی پئی اے، وزیرِ خزانہ محمد اورنگزیب دا انٹرویو

اسلام آباد۔24 دسمبر(اے پی پی) وفاقی وزیرِ خزانہ و محصولات سینیٹر محمد اورنگزیب آکھیے جو پاکستان اہم معاشی موڑ تے پڄ چُکے، معاشی استحکام مسلسل اصلاحات تے پالیسیاں دے تسلسل توں ملکی تے عالمی سطح تے اعتماد بحال تھیندا پئے، معیشت ہݨ محض استحکام دے مرحلے توں نکل تے برآمدات تے مبنی ترقی دی پاسے ودھدی پئی اے، مقامی تے غیر ملکی سرمایہ کاراں کیتے نویں موقع پیدا تھیندے پئن تے ملک پائیدار طویل المدتی ترقی دے رستے تے چل پئے۔ سینیٹر محمد اورنگزیب آکھیا جو مالی سال 2025 دا شروع پاکستان بہتر معاشی بنیاد دے نال کیتے۔ انھاں آکھیا جو سالاں بعد پہلی واری پاکستان پرائمری بجٹ سرپلس حاصل کیتے جیڑھا خساریں دے چکر توں نکلݨ دی علامت اے، مہانگ 38 فیصد توں گھٹ تھی تے سنگل ڈیجٹ اچ آڳئی اے تے زرِ مبادلہ دے ذخیرے 14.5 ارب ڈالر توں ودھ چکئن جیندے نال سرمایہ کاراں دا اعتماد بحال تھئے۔وزیرِ خزانہ واضح کیتا جو معاشی استحکام ضروری بنیاد اے پر پائیدار ترقی اصل چیلنج اے۔ انھاں آکھیا جو حکومت برآمدات تے مبنی حکمتِ عملی اختیار کریندی پئی اے، آئی ٹی برآمدات چار ارب ڈالر توں ودھ چکیاں ہن تے آندے پنج سالاں اچ ݙوگنا تھی سڳدن۔ انھاں آکھیا جو سرکاری اداریں دی نجکاری تے ٹیرف اصلاحات انھاں کمزوریاں دے حل کیتے ہن جیڑھیاں ماضی اچ خزانے تے ٻوجھ بݨدئن۔ انھاں زور ݙتا جو پاکستان دے مستقبل دا دارومدار صرف مالی اشاریں تے کائنی بلکہ آبادی اچ اضافے، موسمیاتی تبدیلی تے تعلیم جہیں بنیادی مسئلیں دے حل تے اے۔ وزیرِ خزانہ عالمی برادری کوں پیغام ݙتا جو پاکستان تجارت تے سرمایہ کاری کیتے تیار اے تے پائیدار ترقی دے دہانے تے کھڑی ایں معیشت اچ شراکت داراں کیتے روشن امکانات موجود ہن۔ جیڑھا وی نواں منصوبہ شروع تھیسی، اوندے نال معیشت کوں وقتی فیدہ تھیسی