پی آئی اے دی نجکاری وݙی تے تاریخی ڈیل ہئی، قومی ایئر لائن دی سابقہ عظمت کوں واپس گھن آوݨ دا سفر تکھے شروع تھی ڳئے، عطا اللہ تارڑ

اسلام آباد۔ 24 دسمبر(اے پی پی) وفاقی وزیرِ اطلاعات و نشریات عطا اللہ تارڑ آکھیے جو پی آئی اے دی نجکاری وݙی تے تاریخی ڈیل ہئی، قومی ایئر لائن دی سابقہ عظمت کوں واپس گھن آوݨ دا سفر تکھے شروع تھی ڳئے۔ اتھاں پی ٹی وی ہیڈ کوارٹرز اچ مشیر نجکاری محمد علی تے سیکریٹری نجکاری کمیشن عثمان اختر باجوہ دے رلے پریس کانفرنس نال خطاب کریندے وفاقی وزیرِ اطلاعات آکھیا جو او پی آئی اے دی کامیاب نجکاری تے مشیر نجکاری محمد علی تے انھاں دی ٹیم کوں مبارخ ݙیندن ، پی آئی اے دی نجکاری ہک تاریخی موقع اے۔ وزیراعظم محمد شہباز شریف دی پالیسیاں اچ اے ہک لازمی حصہ ہئی جیڑھا نقصان اچ ونڄݨ آلے سرکاری اداریں دی نجکاری کیتی ونڄے تے اے اقدام ملکی معاشی بحالی اچ اہم کردار ادا کریسی۔ وفاقی وزیر ݙسایا جو پہلی ڈیل فرسٹ ویمن بینک دی ہئی، اوندے بعد پی آئی اے دی ٻہوں وݙی تے تاریخی ڈیل تھئی اے۔وزیراعظم محمد شہباز شریف دی ہدایت تے پی آئی اے دی ٻولی دا عمل براہِ راست ٹی وی تے ݙکھایا ڳئےجینکوں پوری قوم ݙٹھا۔ انھاں آکھیا جو ٻولی دا عمل ٻہوں شفاف ہئی، ناقدین وی ایندے تے چنڳے خیالات دا اظہار کیتے۔ عطا اللہ تارڑ آکھیا جو 1990ء دی ݙھاکے توں اساں سݨدے آندے پئے ہاسے جو پی آئی اے دی نجکاری تھیندی پئی اے پر کݙاہیں ایندے اچ کامیابی کائنی ملی، اللہ تعالیٰ دے شکر گزار ہیسے جو اڄ اے تاریخی ڈینھ اے جو پی آئی اے پرائیویٹائز تھی ڳئی اے۔ انھاں آکھیا جو پی آئی اے دی نجکاری دے بعد اے خسارہ ہݨ قومی خزانے تے ٻوجھ کائنی تھیوݨا، ٹیکس دہندگان دی جیب توں ایں خسارے کوں پورا کرݨ کیتے ادائیگی کائنی تھیوݨی۔ انھاں آکھیا جو قومی ایئر لائن دی سابقہ عظمت کوں واپس گھن آوݨ دا سفر تکھے شروع تھی ڳئے۔ ایں ڈیل نال جیڑھا وی نواں مرحلہ شروع تھیسی، اوندے نال معیشت کوں وقتی سہارا ملسی۔