چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر دی زیرِ صدارت 273 ویں کور کمانڈرز کانفرنس

راولپنڈی۔ 24 دسمبر(اے پی پی)چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر دی زیرِ صدارت 273 ویں کور کمانڈرز کانفرنس جی ایچ کیو راولپنڈی اچ تھئی۔ فورم مسلح افواج، قانون نافذ کرݨ آلے اداریاں اتے دہشت گردی دے واقعات اچ شہید تھیوݨ آلے معصوم شہریاں دے ایصالِ ثواب کیتے فاتحہ خوانی کیتی۔ آئی ایس پی آر دے مطابق فورم حالیہ دہشت گردی دے واقعات اچ اپݨیاں جاناں دا نذرانہ پیش کرݨ آلیاں اتے غیر ملکی ایماء تے دہشت گردی دے ودھارے دے خلاف مادرِ وطن دا دفاع کرݨ آلیاں کوں خراجِ عقیدت پیش کیتے۔ آرمی چیف و چیف آف ڈیفنس فورسز پاکستان دی مسلح افواج دی غیر متزلزل جرات، پیشہ ورانہ مہارت اتے قربانیاں کوں زبردست خراجِ تحسین پیش کیتا۔ آرمی چیف و چیف آف ڈیفنس فورسز اڄوکے مہینیاں اچ پورے ملک اچ انٹیلی جنس تے مبنی انسدادِ دہشت گردی دیاں کارروائیاں اچ افواجِ پاکستان دی پُرعزم کاوشاں کوں سراہیا۔ فیلڈ مارشل آکھیے جو حکومت اتے پاک فوج دی مشترکہ کوششاں اتے پاکستانی عوام دی ثابت قدم حمایت پاروں ساڈا ملک بتدریج پر یقینی طور تے استحکام، وسیع تر مواقع اتے عزت و وقار دو ودھدا پئے۔ فورم اندرونی و بیرونی سلامتی دی صورتحال دا جامع جائزہ گھندے ملک کوں درپیش خطرات تے آپریشنل تیاریاں تے زور ݙتے۔ کانفرنس دے شرکاء عزم دوہرایا جو بھارتی سرپرستی اچ سارے دہشت گرداں، انھاں دے سہولت کاراں اتے معاونین نال فیصلہ کن اتے بغیر کہیں رعایت دے نمٹیا ویسی۔ فورم دہشت گردی، جرائم اتے سیاسی مفادات وچال گٹھ جوڑ کوں یکسر مسترد کر ݙتے۔ فورم آکھیا جو قومی یکجہتی، سلامتی اتے استحکام کوں نقصان پچاوݨ دی کہیں کوں اجازت کائنا ݙتی ویسی، چاہے او عناصر سیاسی ہوون یا کوئی ٻئے۔ مسلح افواج اتے پاکستان دے عوام وچال تفرقہ پیدا کرݨ دی کہیں کوں اصلوں اجازت کائنی۔ فورم بلوچستان حکومت دے خصوصی ترقیاتی اقدامات کوں سراہیا جیہڑے مقامی سطح تے عوام کوں بااختیار بݨاوݨ اتے سماجی روابط دے ذریعے گورننس نال جڑے دہشت گردی دے عوامل دا خاتمہ کریندن۔ کانفرنس دے شرکاء پائیدار امن اتے استحکام کوں یقینی بݨاوݨ کیتے قومی ایکشن پلان دے مطابق ٻئے علاقیاں اچ وی ایہو ڄھیں عوامی اقدامات دی لوڑھ تے زور ڈتا۔ فورم کشمیری عوام دے حقِ خودارادیت اتے انھاں دی جائز جدوجہد کیتے پاکستان دی ثابت قدمی دا اعادہ کیتے۔ شرکاء کانفرنس مسئلہ فلسطین اتے پاکستان دے اصولی موقف دی وی توثیق کریندے غزہ اچ فوری اتے مستقل جنگ بندی، بلا روک ٹوک انسانی رسائی تاے فلسطینی ریاست کیتے ہک قابلِ اعتماد راہ دا مطالبہ کیتے۔ کانفرنس دے چھیکڑ اچ آرمی چیف و چیف آف ڈیفنس فورسز کمانڈرز کوں آپریشنل تیاری، نظم و ضبط، تربیت، جسمانی فٹنس، نویں جدتاں اتے میدانِ جنگ اچ پیشہ ورانہ مہارت دے اعلیٰ ترین معیار کوں برقرار رکھݨ دی ہدایت کیتی۔ آرمی چیف و چیف آف ڈیفنس فورسز پاک فوج دی قومی خودمختاری اتے علاقائی سالمیت دا مستقل تحفظ کریندے “کنونشنل تے سب کنونشنل” توں گھن تے ہائبرڈ اتے غیر متناسب چیلنجز تئیں دے خطرات دا مؤثر طریقے نال مقابلہ کرݨ دی صلاحیت تے مکمل اعتماد کیتے۔ ایں حوالے نال جیہڑا وی نواں آپریشن شروع تھیسی، اوندے نال ملک کوں امن تے تحفظ ملسی اتے دشمن دی ہر سازش ناکام تھیسی۔