ݙکھی انسانیت دی خدمت توں ودھ تے کوئی کم کائنی، کینسر ہسپتال دا قیام خوش آئند اے، وزیراعظم شہباز شریف

مظفر آباد۔ 28 دسمبر(اے پی پی) وزیراعظم محمد شہباز شریف آزاد کشمیر وچ کینسر دی تشخیص و علاج کیتے ہسپتال دے قیام دی تعریف کریندے آکھیے جو ݙکھی انسانیت دی خدمت توں ودھ تے کوئی کم کائنی، مریضاں دے علاج کیتے 24 گھنٹے سہولتاں یقینی بݨایا ونڄے۔ او اتوار کوں اتھاں کشمیر انسٹی ٹیوٹ آف نیوکلیئر میڈیسن، انکولوجی اینڈ ریڈیالوجی (کنور) دی افتتاحی تقریب توں خطاب کریندے پئے ہن۔ وزیراعظم آزاد کشمیر راجہ فیصل ممتاز راٹھور، احسن اقبال، رانا ثنا اللہ، امیر مقام سودھے وفاقی وزراء، آزاد کشمیر دے ارکانِ اسمبلی تے ماہرین وی ایں موقع تے موجود ہن۔ وزیراعظم آکھیا جو انھاں کوں خوشی اے جو آزاد کشمیر وچ وی ہسپتال قائم کیتا ڳئے، ایندے توں ودھ انسانیت دی کوئی خدمت نی تھی سڳدی، پہلے مریضاں کوں سینکڑاں میل دا سفر کرݨاں پوندا ہئی جیڑھا تکلیف دہ تے مہانگا ہئی۔وزیراعظم آکھیا جو او خود وی کینسر دے مریض رہئن تے انھاں کوں انھاں مشکلاں دا احساس اے، لوگ ایں مہانگے مرض دا علاج برداشت نی کر سگدے ۔ انھاں ہدایت کیتی جو جدید وسائل کوں بروئے کارگھن آتے مریضاں دا علاج کیتا ونڄے تے سہولتاں کوں 24 گھنٹے فعال رکھیا ونڄے۔ ایندے توں پہلے وزیراعظم تختی دی نقاب کشائی کرتے ہسپتال تے میڈیکل کالج دا افتتاح کیتا۔ وزیراعظم کوں ݙسایا ڳیا جو ایٹمی توانائی کمیشن دے کینسر دے علاج کیتے ملک بھر وچ 21 ہسپتال کم کریندے پئن۔ ڈی جی آئی اے ای اے رافیل ماریانو گروسی وی ویڈیو لنک دے ذریعے خطاب کیتا تے آکھیا جو آزاد کشمیر وچ کینسر دے علاج کیتے ہسپتال دا قیام اہم سنگِ میل اے ۔ ایں مقصد کیتے حکومتِ پاکستان دے نال پوری قوم دی کوششاں رنگ لیسن تے ہر پاکستانی ایں مشن وچ نال کھڑا تھیسی۔