شہید محترمہ بینظیر بھٹو سارے مکاتبِ فکر کیتے امید تے حوصلے دی علامت ہن، انہاں ہمیشہ عوام دے حقوق کیتے آواز بلند کیتی، سید یوسف رضا گیلانی

اسلام آباد۔ 30 دسمبر (اے پی پی) چیئرمین سینیٹ سید یوسف رضا گیلانی شہید محترمہ بینظیر بھٹو کوں خراجِ عقیدت پیش کریندیں ہوئیں آکھیے جو محترمہ دی شہادت نہ صرف پاکستان بلکہ عالمی برادری کیتے ہک ناقابلِ تلافی نقصان اے، شہید محترمہ بینظیر بھٹو تمام مکاتبِ فکر کیتے امید تے حوصلے دی علامت ہن اتے انہاں ہمیشہ عوام دے حقوق کیتے آواز بلند کیتی، انہاں آپݨے والد شہید ذوالفقار علی بھٹو دے مشن کوں جرات، استقامت تے بصیرت دے نال اڳوں ودھایا۔ اے ڳالھیں انہاں بینظیر انکم سپورٹ پروگرام (بی آئی ایس پی) ولوں شہید محترمہ بینظیر بھٹو دے 18 ویں یومِ شہادت دی مناسبت نال منعقدہ تقریب اچ بطور مہمانِ خصوصی خطاب کریندیں ہوئیں کیتے۔ ایں موقع تے چیئرپرسن بینظیر انکم سپورٹ پروگرام سینیٹر روبینہ خالد، سیکرٹری عامر علی احمد، بی آئی ایس پی دے افسران تے عملے بھرپور شرکت کیتی۔ چیئرمین سینیٹ آکھیا جو بینظیر انکم سپورٹ پروگرام شہید محترمہ بینظیر بھٹو دے وژن تے عوام دوست سوچ دا عملی اظہار اے، ایں پروگرام نال مستحق گھراݨیاں دی تریمتیں کوں بااختیار بݨایا ڳیا، انہاں کوں گھراݨے دی سربراہ دا درجہ ݙتا ڳیا تے شناختی کارڈ دے ذریعے شہری دی شناخت، مالی معاملات اچ شمولیت تے ووٹ دے حق کوں تقویت ملی۔ انہاں آکھیا جو مستحق تریمتیں دی معاشی خودمختاری کیتے بی آئی ایس پی دا کردار کلیدی اے تے ایندا تسلسل وقت دی ضرورت اے۔ایں موقع تے چیئرپرسن بی آئی ایس پی سینیٹر روبینہ خالد آکھیا جو شہید محترمہ بینظیر بھٹو نہ صرف پاکستان بلکہ دنیا بھر دی تریمتیں کیتے مشعلِ راہ ہن، تریمتیں آپݨی طاقت، حوصلہ تے فکری آزادی بی بی شہید دے ناں توں حاصل کریندیاں ہن۔ انہاں آکھیا جو بی آئی ایس پی گزشتہ 18 سالاں توں محترمہ بینظیر بھٹو دے وژن تے عمل پیرا اے تے اج ہک کروڑ توں ودھ مستحق تریمتیں ایں پروگرام توں فائدہ چیندی پئن۔تقریب دے دوران بی آئی ایس پی آفیسر ایسوسی ایشن دے صدر سردار عظمت وی شہید محترمہ بینظیر بھٹو کوں خراجِ عقیدت پیش کیتا۔ ایں موقع تے شہید محترمہ دی یاد اچ کلام تے نغمے وی پیش کیتے ڳئے۔ تقریب دے چھیکڑ تے چیئرپرسن بی آئی ایس پی سینیٹر روبینہ خالد چیئرمین سینیٹ سید یوسف رضا گیلانی کوں یادگاری شیلڈ پیش کیتی۔