وزیراعظم محمد شہباز شریف نال چیئرمین نیب دی ملاقات

اسلام آباد۔ 27 جنوری (اے پی پی) وزیراعظم محمد شہباز شریف قومی احتساب بیورو (نیب) دی پیشہ ورانہ آزادی اتے قومی وسائل دے تحفظ دے مشن دی حمایت دا اعادہ کریندے ہوئیں نیب دی کارکردگی دی تعریف کیتی اے۔ وزیراعظم محمد شہباز شریف نال چیئرمین نیب لیفٹیننٹ جنرل (ر) نذیر احمد وزیراعظم ہاؤس اچ ملاقات کیتی جیندے اچ انھاں وزیراعظم کوں نیب دی سالانہ رپورٹ برائے سال 2025ء پیش کیتی۔ نائب وزیراعظم اسحاق ڈار وی ملاقات اچ موجود ہن۔ وزیراعظم نیب کوں ٹیکنالوجی تے چلݨ والے ادارے اچ بدلݨ دی تعریف کیتی اتے خاص طور تے مصنوعی ذہانت (AI) دی مدد نال تحقیقات کوں سراہیا۔ انھاں نیب دے ای-آفس فریم ورک دی وی تعریف کیتی جیہڑا کفایت شعاری دے ہدف دے عین مطابق اے۔ چیئرمین نیب بریفنگ ݙیندے ہوئیں ݙسایا جو پچھلے سال نیب 6.213 ٹریلین روپے دی ریکوری کیتی اے جیہڑا ہک ریکارڈ اے، 2.98 ملین ایکڑ سرکاری تے جنگلات دی زمین ولا حاصل کیتی ڳئی اے جیندی قیمت تقریباً 5.99 ٹریلین روپے اے۔ ایندے علاوہ جعلی ہاؤسنگ سکیماں دے 115,587 متاثرین کوں 180 بلین روپے ولا ݙیوائے ڳن۔ چیئرمین نیب آکھیے جو “کھلی کچہری” دے ذریعے لوکاں دا اعتماد بحال تھئے اتے بیورو ڈراوݨ دھمکاوݨ دی بجائے شکایات دے ازالے دا ذریعہ بݨسی۔