وزارتِ مذہبی امور دا نویں نسل دی نظریاتی تربیت کیتے وݙا اقدام، قومی سیرت، نعت تے مقالات دے مقابلیاں کیتے 50 لکھ روپے توں ودھ دے 48 انعامات دا اعلان

اسلام آباد۔ 28 جنوری (اے پی پی) وفاقی وزارتِ مذہبی امور تے بین المذاہب ہم آہنگی سال 1448ھ/2026ء کیتے ملک گیر سطح تے 51 ویں قومی مقابلہ کتبِ سیرت، نعت تے مقالات دے انعقاد دا اعلان کر ݙتے۔ ایں سال انھاں مقابلیاں دا بنیادی مقصد نویں نسل کوں دورِ حاضر دے چیلنجاں نال نبڑݨ کیتے سیرتِ طیبہ ﷺ دی روشنی اچ تیار کرݨ اتے ملک بھر دے اہل قلم دی حوصلہ افزائی کرݨ اے۔ وزارت مختلف کیٹگریز اچ مجموعی طور تے 48 انعامات دا اعلان کیتے جیندے کیتے کل مالیت 50 لکھ 55 ہزار روپے اے ۔ ایں مقابلے اچ اردو تے علاقائی زباناں دے نال نال انگریزی زبان اچ لکھیاں ڳئیاں کتاباں کوں وی شامل کیتا ڳئے تاںجو عالمی سطح تے اسلام دا پرامن سنیھا پڄایا ونڄ سڳے۔ انگریزی زبان اچ سیرتِ طیبہ تے لکھیاں ڳئیاں کتاباں کیتے پہلا انعام 150,000 روپے، ݙوجھا 100,000 روپے تے تریجھا 80,000 روپے مقرر کیتا ڳئے۔ وزارتِ مذہبی امور دے ڈپٹی ڈائریکٹر سیرت محمد خلیق دے مطابق مقابلے پنج وݙی کیٹگریز اچ تھیسن۔ مقابلہ کتبِ سیرت (اردو، انگریزی، عربی تے علاقائی زباناں) کیٹگری اچ اردو زبان دی کتاب کیتے پہلا انعام 175,000 روپے رکھیا ڳئے ۔ ٻالاں کیتے لکھیاں ڳئیاں کتبِ سیرت کیتے وی خصوصی انعامات (پہلا: 125,000 روپے) مقرر ہن۔ شیڈول دے مطابق مقابلہ کتبِ نعت اردو تے علاقائی زباناں اچ نعت دے مجموعیاں تے 75,000 توں 125,000 روپے تائیں دے انعامات ݙتے ویسن۔ مقابلہ کتبِ اسلامی (برائے خواتین) کیٹگری اچ تریمت قلم کاراں دی خصوصی حوصلہ افزائی کیتے اسلامی موضوعات تے بہترین کتاباں کیتے پہلا انعام 175,000 روپے رکھیا ڳئے ۔ مقابلہ رسائل تے مجلات کیٹگری اچ سیرت تے نعت دے خصوصی نمبر شائع کرݨ آلے اداریاں کیتے 60,000 توں 100,000 روپے تئیں دے انعامات دا اعلان کیتا ڳئے۔ مقابلہ مقالاتِ سیرت اچ ایں سال مقالے دا عنوان “نسلِ نو کا تحفظ، تعمیر اور کردار، سیرت النبی ﷺ کی روشنی میں” منتخب کیتا ڳئے ۔ ایندے اچ قومی سطح تے پہلا انعام 100,000 روپے جݙاں جو صوبائی سطح تے 75,000 روپے اے ۔ وزارتِ مذہبی امور ایں علمی مقابلے دے دائرے کوں ودھیندے ہوئیں گلگت بلتستان، آزاد جموں و کشمیر تے وفاقی دارالحکومت اسلام آباد کیتے وی وکھرے ترائے سانجھے انعامات دا اعلان کیتے۔ انھاں علاقیاں دے مقالہ نگاراں کیتے پہلا انعام 75,000 روپے، ݙوجھا 60,000 روپے تے تریجھا انعام 50,000 روپے مقرر کیتا ڳئے ۔ ایں اقدام دا مقصد دور دراز علاقیاں دے لکھاریاں دی حوصلہ افزائی کرݨا تے انھاں کوں قومی دھارے اچ شامل کر تے سیرتِ طیبہ ﷺ دا سنیھا ملک دے کونے کونے تائیں پڄاوݨ اے۔ وزارتِ مذہبی امور دے مطابق امیدواراں کوں وزارت دی ویب سائٹ (www.mora.gov.pk) تے آن لائن فارم پُر کرݨا لازمی اے ۔ کتاباں تے مقالات جمع کرواوݨ دی آخری تاریخ 31 مارچ 2026 اے ۔ مقالات کیتے اے آئی (AI) تے کاپی دی شرح 19 فیصد توں گھٹ ہووݨ ضروری اے پئی اتے اے ایچ ای سی (HEC) دے معیار دے مطابق ہووݨی چاہیدی اے۔ مقالہ نگار کیتے گھٹ توں گھٹ تعلیمی قابلیت 14 یا 16 سالہ تعلیم (گریجویشن یا مساوی) ہووݨ لازمی اے پئی۔ وزارتِ مذہبی امور واضح کیتے جو اے مقابلہ بین المذاہب ہم آہنگی تے اسلامی تعلیمات دی اصل روح کوں اجاگر کرݨ کیتے ہک اہم پلیٹ فارم ثابت تھیسی (تھیسی)۔