بھارت ساریں توں وݙا اسلاموفوبک ملک اے، پاکستانی مندوب دا اقوامِ متحدہ دی جنرل اسمبلی دے اجلاس توں خطاب

اقوامِ متحدہ۔ 17 مارچ (اے پی پی) پاکستان اقوامِ متحدہ دے اعلیٰ سطحی اجلاس اچ بھارت تے تنقید کریندے آکھیے جو او دنیا دا ساریں توں وݙا اسلاموفوبک ملک اے تے مسلماناں سودھے آپݨیاں اقلیتاں دے خلاف نفرت انگیز اقدامات دی حمایت کریندے۔ اے اجلاس بین الاقوامی ݙینھ برائے اسلاموفوبیا نال نبٹݨ دے موقع تے منعقد تھیا۔ پاکستان دے مستقل مندوب عاصم افتخار احمد جنرل اسمبلی اچ خطاب کریندے آکھیا جو بھارت مسلماناں دے نال ٻئی مذہبی اقلیتاں دے خلاف تشدد، مسیتاں دی تباہی تے عوامی قتل جیھے اقدامات اچ ملوث لوکاں کوں سزا ݙیوݨ اچ ناکام رہیے۔انھاں بھارت توں مطالبہ کیتا جو او انھاں ”گھناؤنے اعمال“ اچ ملوث لوکاں دے خلاف کارروائی کرے۔ انھاں مزید آکھیا جو بھارت اچ اسلاموفوبیا محض کجھ حاشیے تے موجود لوکاں دا کائنی بلکہ ریاست تے حکومت دی سرپرستی اچ جاری اے، تے پوری دنیا اچ اسلاموفوبک واقعات دی ساریں توں وݙی تعداد بھارت اچ ݙٹھی ڳئی اے۔ مثال دے طور تے سری نگر اچ مسلماناں کوں مسلسل ستویں سال جمعہ دی نماز دے دوران شرکت توں روک ݙتا ڳئے۔ اقوامِ متحدہ دے سیکرٹری جنرل انتونیو گوتریش خطاب اچ سارے ملکاں توں مسلماناں دے خلاف ودھدی نفرت کوں ختم کرݨ، انسانی حقوق تے مساوات دے اصولاں تے عمل کرݨ دی اپیل کیتی۔ انھاں زور ݙتا جو اسلاموفوبیا دے خلاف جدوجہد صرف مسلماناں دے دفاع تئیں محدود کائنی بلکہ اے انسانیت دی مشترکہ جدوجہد اے، جیندے نال رواداری پیدا تھیسی