ملک اچ پٹرولیم مصنوعات دا مناسب ذخیرہ موجود اے،وزیراعظم دی زیرِ صدارت اجلاس اچ بریفنگ

اسلام آباد۔ 17 مارچ (اے پی پی) وزیراعظم محمد شہباز شریف دی زیرِ صدارت خطے دی صورتحال دے پیشِ نظر ایندھن دی بچت تے کفایت شعاری دے اقدامات دے نفاذ تے جائزہ اجلاس تھیا جیندے اچ کفایت شعاری تے بچت دے اقدامات تے عملدرآمد دی پیش رفت دا ݙسایا ڳیا۔ اجلاس اچ نائب وزیراعظم تے وزیرِخارجہ اسحاق ڈار، وفاقی وزیرِ اقتصادی امور احد خان چیمہ، وفاقی وزیرِ خزانہ و محصولات محمد اورنگزیب، وزیرِپٹرولیم علی پرویز ملک، وفاقی وزیرِ اطلاعات و نشریات عطاء اللہ تارڑ، وفاقی وزیرِ موسمیاتی تبدیلی ڈاکٹر مصدق ملک، وفاقی وزیرِ انفارمیشن ٹیکنالوجی و ٹیلی کام شزا فاطمہ، وزیرِ مملکت خزانہ و ریلوے بلال اظہر کیانی، معاونِ خصوصی طارق باجوہ، گورنر سٹیٹ بینک جمیل احمد تے متعلقہ اعلیٰ سرکاری افسراں شرکت کیتی۔وزیراعظم دفتر دے میڈیا ونگ توں جاری بیان موجب ایں موقع تے وزیراعظم محمد شہباز شریف پاکستان دی پٹرولیم درآمدات دی سپلائی چین کوں بہتر بݨاوݨ کیتے وزیرِ پٹرولیم کوں مزید متحرک تھیوݨ دی ہدایت کریندے آکھیا جو حالات دی بہتری تئیں سارے متعلقہ ادارے ہنگامی اقدامات کیتے تیار رہن۔ اجلاس کوں بریفنگ اچ ݙسایا ڳیا جو وزیراعظم دی طرفوں جاری کیتی ڳئی ہدایات تے عملدرآمد یقینی بݨایا ویندا پئے، انٹیلی جنس بیورو سارے اقدامات تے عملدرآمد دی نگرانی رپورٹ پیش کریسی، ملک اچ پٹرولیم مصنوعات دا ضرورتاں موجب مناسب ذخیرہ موجود اے، ساری صورتحال دی نگرانی کیتی ویندی پئی اے تے پٹرولیم مصنوعات دا ریکارڈ رکھیا ویندا پئے تاں جو کہیں قسم دی بے قاعدگی دی وقتی نشاندہی تھی سڳے۔ بریفنگ اچ ݙسایا ڳیا جو سارے کابینہ ارکان رضاکارانہ طور تے تنخواہیں کائنی ڳھدیاں، سرکاری محکمیں دی تیل دی کٹوتی دے مثبت نتائج سامݨے آندے پئن، بچت دے اقدامات نال موجودہ صورتحال اچ عوام کوں ریلیف ݙیوݨ اچ مدد ملسی، ملکی ضرورتاں پوریاں کرݨ کیتے ملک اچ ادویات دا مناسب ذخیرہ موجود اے، ورک فرام ہوم دے حوالے نال سرکاری ای-آفس دی سہولت ݙیوݨ کیتے خصوصی کنیکٹیویٹی دے انتظامات وزارتِ انفارمیشن ٹیکنالوجی و ٹیلی کام دی طرفوں کیتے ونڄ چکئن۔