افغان طالبان رجیم دی طرفوں پاکستان تے کابل اچ منشیات بحالی دے ہسپتال کوں نشانہ بݨاوݨ دا الزام تے کوڑا دعویٰ سراسر بے بنیاد اے، عطاء اللہ تارڑ

اسلام آباد۔ 17 مارچ (اے پی پی) وفاقی وزیرِ اطلاعات و نشریات عطاء اللہ تارڑ افغان طالبان رجیم دی طرفوں پاکستان تے کابل اچ منشیات دی بحالی دے ہسپتال کوں نشانہ بݨاوݨ دے الزام تے کوڑے دعوے کوں سراسر بے بنیاد قرار ݙیندے آکھیے جو افغان طالبان رجیم اے الزام لا تے مزید کوڑ ٻولیندی پئی اے جو پاکستان کابل اچ منشیات دی بحالی دے ہسپتال کوں نشانہ بݨائے۔ پاکستان دہشت گردی دے خلاف آپݨی جاری جنگ اچ صرف انھاں عسکری تے دہشت گرد اہداف بشمول افغان طالبان رجیم دے بنیادی ڈھانچے کوں نشانہ بݨیندا پئے جیڑھے پاکستان دے اندر دہشت گرد حملیں دی منصوبہ بندی، سہولت کاری، پناہ گاہ، تربیت یا حوصلہ افزائی کیتے براہِ راست یا بالواسطہ طور تے استعمال تھیندے پئن۔ سماجی رابطے دے پلیٹ فارم ”ایکس“ تے آپݨی ہک پوسٹ اچ انھاں آکھیا جو کابل تے ننگرہار اچ 16 مارچ 2026ء دی رات کوں کیتے ڳئے حملے قطعی، دانستہ تے پیشہ ورانہ ہن، کہیں ہسپتال، کہیں منشیات دی بحالی دے مرکز تے کہیں شہری سہولت دی عمارت کوں نشانہ کائنی بݨایا ڳیا۔ اہداف اچ فوجی تے دہشت گردی دا بنیادی ڈھانچہ ہئی جیندے اچ گولہ بارود تے تکنیکی آلات دے ذخیرہ کرݨ دیاں جہیں تے پاکستان دے خلاف دشمنی دی سرگرمیاں نال منسلک ٻئیاں تنصیبات شامل ہن۔ انھاں آکھیا جو جیویں جو روایت اے سارے چھی حملیں کوں وقتی طور تے وزارتِ اطلاعات دی طرفوں ویڈیو فوٹیج دے نال میڈیا کوں ݙتا ڳیا جیندے نال اہداف دی نوعیت ساریں کیتے واضح تھی ڳئی۔ ݙتتیاں ڳئیاں ویڈیوز تے تصویراں شک دی کوئی گنجائش کائنی چھوڑیندیاں۔ کابل اچ بھاء دے شعلے تے ثانوی دھماکے مزید ایں ڳالھ دی تصدیق کریندن جو گولہ بارود دے ذخیرہ کرݨ دی جاہ کوں درستی دے نال نشانہ بݨایا ڳئے۔انھاں آکھیا جو موجودہ پروپیگنڈہ ہک ایجھی حکومت دی طرفوں آندا پئے جیندے عہدیداراں ول ول کوڑے بیانات، کوڑے دعویں، پہلے دیاں پوسٹاں کوں منتخب ڈیلیٹ کرݨ، سامعین کوں گمراہ کرݨ تے سچائی کوں لکاوݨ کیتے پراݨیاں تصویراں دی گردش تے انحصار کیتے، انھاں دا تازہ ترین الزام دھوکہ دہی دی بوسیدہ روایت دا حصہ اے۔ وفاقی وزیر آکھیا جو اصل مسئلہ اونویں برقرار اے، پاکستان، خطے تے دنیا کوں افغان طالبان حکومت دے زیرِ اثر علاقے توں دہشت گردی دے سنگین خطرے دا سامݨا اے، اے خطرہ ٻیا وحشیانہ تھی ڳئے، منشیات دے عادی لوکاں تے نشوم ٻالاں دا خودکش بم حملیں سودھے گھناؤنے مقاصد کیتے استحصال کیتا ویندا پئے۔ انھاں آکھیا جو پاکستان دا موقف واضح اے جو اساں آپݨے شہریاں دے دفاع، دہشت گردی دی صلاحیت کوں گھٹ کرݨ تے سرحد پار توں پاکستان دے خلاف دہشت گردی کرݨ آلیاں کوں محفوظ پناہ گاہواں توں محروم کرݨ کیتے ہر ضروری اقدام کریندے رہسوں۔