صدر آصف علی زرداری دا اسرائیلی حملے اچ ڈاکٹر علی لاریجانی دے قتل تے ݙکھ تے افسوس، ایرانی حکومت تے عوام نال تعزیت

اسلام آباد۔ 18 مارچ (اے پی پی) صدرِ مملکت آصف علی زرداری جاری اسرائیلی حملیں دے دوران ایران دے سینئر رہنما ڈاکٹر علی اردشیر لاریجانی دے قتل تے ݙکھ تے افسوس کریندے اسلامی جمہوریہ ایران دی حکومت تے عوام نال دلی تعزیت کیتی اے۔ ایوانِ صدر دے پریس ونگ توں جاری بیان موجب صدرِ مملکت نومبر 2025 اچ ڈاکٹر علی اردشیر لاریجانی دے سرکاری دورہ پاکستان کوں یاد کریندے آکھیا جو ایں موقع تے انہاں مختلف شعبیں اچ ݙوطرفہ تعاون کوں مزید ودھاوݨ دے طریقیں تے تبادلہ خیال کیتا ہئی۔ انہاں پاکستان-ایران تعلقات اچ مثبت پیش رفت کوں مضبوط بݨاوݨ اچ ڈاکٹر لاریجانی دے کردار دی تعریف کیتی ۔ صدرِ مملکت آکھیا جو جاری کشیدگی پاروں انسانی جاناں دے ضیان تے بنیادی ڈھانچے کوں ضیان پڄدا پئے جیندے نال پورے خطے اچ سنگین معاشی اثرات تے عدم استحکام پیدا تھیندا پئے۔ صدرِ مملکت تحمل تے کشیدگی وختی مکاوݨ تے زور ݙٰیندے سارے فریقین تے زور ݙتا جو او ڳالھ مہاڑ تے سفارت کاری کوں ترجیح ݙیون۔ انہاں امید ظاہر کیتی جو صورتحال وقتی مستحکم تھی ویسے تے مزید جانی ضیان تے خطے اچ کشیدگی کھنڈݨ توں پہلے امن بحال تھی ویسے ۔ صدر آصف علی زرداری آکھیا جو پاکستان کشیدگی اچ کمی تے امن دے ودھارے کیتے ساریاں کوششاں دی حمایت جاری رکھݨ دے عزم دا اعادہ کریندے تے او خطے اچ تناؤ گھٹ کرݨ کیتے ڳالھ مہاڑ تے سفارتی کوششاں کوں اڳوں ودھاوݨ اچ تعمیری کردار ادا کرݨ کیتے تیار اے۔