ملک دے ریلوے انفراسٹرکچر دی پائیدار بنیاداں تے نویں سروں تعمیر دی ٻہوں لوڑھ اے ، وزیراعظم شہباز شریف

اسلام آباد۔ 18 مارچ (اے پی پی) وزیراعظم محمد شہباز شریف ریلوے دی ملکی معیشت تے مواصلات اچ ریڑھ دی ہݙی دی حیثیت کوں اجاگر کریندے آکھیے جو ملک دے ریلوے انفراسٹرکچر دی پائیدار بنیاداں تے تعمیرِ نو دی ٻہوں لوڑھ اے تے علاقائی تجارت و رابطے کیتے ریلوے کوں جدید بنیاداں تے ترقی ݙیوݨ قومی پالیسی دا اہم جزو اے۔ او ٻدھ کوں اتھاں اپݨی زیرِ صدارت وزیراعظم ہاؤس اچ منعقد تھیوݨ الے پاکستان ریلویز دی سٹیئرنگ کمیٹی دے اجلاس نال خطاب کریندے پئے ہن۔ اجلاس اچ وفاقی وزیر اقتصادی امور احد خان چیمہ، وفاقی وزیر ریلوے حنیف عباسی، وفاقی وزیر خزانہ و محصولات محمد اورنگزیب، وزیر مملکت برائے خزانہ و ریلوے بلال اظہر کیانی تے متعلقہ اعلیٰ سرکاری افسراں شرکت کیتی۔ وزیراعظم آفس دے میڈیا ونگ دی طرفوں جاری بیان دے مطابق اجلاس نال خطاب کریندے وزیراعظم آکھیا جو ریلوے دا نظام ملک دی معیشت تے مواصلات اچ ریڑھ دی ہݙی دی حیثیت رکھیندے۔ انہاں ملکی معاشی تے صنعتی ترقی کیتے ملک بھر دے ریلوے انفراسٹرکچر دی پائیدار بنیاداں تے تعمیرِ نو کرݨ دی ضرورت تے زور ݙیندے ہوئیں آکھیا جو علاقائی تجارت و روابط کیتے ریلوے کوں جدید بنیاداں تے ترقی ݙیوݨ قومی پالیسی دا اہم جزو اے۔ انہاں پاکستان ریلویز کوں مال برداری دیاں سہولتاں اپ گریڈ کرݨ دی ہدایت کریندے آکھیا جو موجودہ علاقائی صورتحال دے تناظر اچ ایندھن دی بچت دے حوالے نال چیزاں دی نقل و حمل کیتے ریلوے دی فریٹ سروس دا استعمال ناگزیر تھی چکئے۔ اجلاس اچ پاکستان ریلویز اچ جاری اصلاحات تے بریفنگ اچ ݙسایا ڳیا جو پاکستان ریلویز دی فریٹ سروس اچ ایں سال 21 فیصد اضافہ متوقع اے، ایشیائی ترقیاتی بینک دے تعاون نال مین لائن ون (ایم ایل-ون) دے پہلے فیز کراچی-روہڑی سیکشن دی اپ گریڈیشن دے حوالے نال کم جاری اے، انجینئرنگ ڈیزائن، ماحولیاتی اثرات متعلق فیلڈ سروے تے زمین دی خریداری دا عمل جاری اے، تھر ریل کنکٹیویٹی منصوبے تے 57 فیصد کم مکمل تھی چکئے۔ بریفنگ موجب مین لائن تھری دے روہڑی-نوکنڈی سیکشن دی اپ گریڈیشن صوبہ بلوچستان توں معدنیات دی ترسیل دے حوالے نال ہک ٻہوں اہم منصوبہ اے جیندے کیتے ڈیزائن کنسلٹنٹ دی خدمات حاصل کیتیاں ونڄ چکئن تے پی-سی ون وی تیار تھی چکئے۔ پاکستان ریلویز دی ڈیجیٹائزیشن دا عمل وی جاری اے۔ رابطہ ایپلی کیشن، کیش لیس ٹکٹنگ تے ریلوے سٹیشناں تے مفت وائی فائی ݙیوݨ اہم سنگِ میل ہن۔ بریفنگ اچ ݙسایا ڳیا جو فریٹ مینجمنٹ سسٹم، ڈیجیٹل وئینگ بریجز تے رولنگ سٹاک ٹریکنگ سسٹم نال فریٹ سروسز دا معیار بہتر تے شفاف تھئے۔