عمران خان دے ٻال پاکستانی شہری ہووݨ دے ناطے نائیکوپ دے ذریعے پاکستان آسڳدن، وفاقی وزیر اطلاعات عطاء اللہ تارڑ دا جمائما گولڈ سمتھ کوں ٹویٹر تے جواب

اسلام آباد۔ 18 مارچ (اے پی پی) وفاقی وزیر اطلاعات و نشریات عطاء اللہ تارڑ آکھیا اے جو ماضی وانڳوں ایں واری وی عمران خان دی عید دے ݙینھ ٻالاں نال فون تے ڳالھ کروائی ویسے۔ عمران خان دے ٻال پاکستانی شہری ہووݨ دے ناطے نائیکوپ دے ذریعے پاکستان آسڳدن تے ایندے کیتے انہاں کوں پاکستانی ویزے دی لوڑھ کائنی ہوندی۔ سماجی رابطے دے پلیٹ فارم “ایکس” (ٹویٹر) تے جمائما گولڈ سمتھ دی پوسٹ دا جواب ݙیندے وفاقی وزیر اطلاعات آکھیا جو عمران خان دے ٻال پاکستان اچ قیام دے دوران پاکستانی قوانین دی مکمل پاسداری دے پابند ہوسن۔ واضح رہے جو جمائما گولڈ سمتھ اپݨے پُتراں دے پاکستان آوݨ کیتے ویزا درخواست دے بارے اچ تاخیر متعلق پوسٹ کیتی ہئی۔