علمائے کرام اتحاد کوں مضبوط، انتہاپسندی دا مقابلہ کرن، فیلڈ مارشل سید عاصم منیر

راولپنڈی۔ 19 مارچ (اے پی پی) چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر علمائے کرام دے اہم کردار تے زور ݙیندے آکھیے جو او اتحاد کوں مضبوط کرن تے انتہاپسندی دا مقابلہ کرن۔ مذہبی جذبات کوں ملک اچ تشدد بھڑکاوݨ کیتے استعمال کائناں تھیوݨ ݙتا ویسی، دہشت گرداں تے انھاں دے ڈھانچے دے خاتمے کیتے درست تے انٹیلی جنس دی بنیاد تے کارروائیاں کیتیاں ویسن۔ آئی ایس پی آر توں جاری بیان موجب چیف آف آرمی سٹاف و چیف آف ڈیفنس فورسز فیلڈ مارشل سید عاصم منیر نال اہلِ تشیع مکتبِ فکر دے علمائے کرام اتھاں ملاقات کیتی، جیندے اچ قومی سلامتی تے معاشرتی ہم آہنگی اچ علمائے کرام دے کردار تے ڳالھ مہاڑ کیتی ڳئی۔فیلڈ مارشل اتحاد، برداشت تے قومی یکجہتی دے ودھارے خصوصاً مس انفارمیشن، فرقہ وارانہ بیانیے تے ٻاہرلی سرپرستی اچ تھیوݨ آلیاں عدم استحکام دی کوششاں دا مقابلہ کرݨ دے حوالے نال علمائے کرام دے اہم کردار تے زور ݙتا۔ آپریشن غضب لِلحق دا حوالہ ݙیندے ہوئے انھاں زور ݙتا جو پاکستان آپݨی سرزمین دے خلاف دہشت گردی کیتے افغان سرزمین دے استعمال کوں ہرگز برداشت کائناں کریسی۔ انھاں دہشت گرداں تے انھاں دے ڈھانچے دے خاتمے دے عزم دا اعادہ کریندے آکھیا جو بھاویں او کتھائیں وی موجود ہوون، ایندے کیتے درست تے انٹیلی جنس دی بنیاد تے کارروائیاں کیتیاں ویسن۔ انھاں ایں ڳالھ تے وی زور ݙتا جو افغان طالبان آپݨی سرزمین کوں پاکستان دے خلاف دہشت گردی کیتے استعمال تھیوݨ توں روکن۔فیلڈ مارشل شرکاء کوں خطے اچ کشیدگی گھٹ کرݨ کیتے پاکستان دی کوششاں تے فعال سفارتکاری دا ݙسایا۔ انھاں علمائے کرام دے اہم کردار تے زور ݙتا جو او اتحاد کوں مضبوط کرن تے انتہاپسندی دا مقابلہ کرن، تے ایں ڳالھ دا اعادہ کیتا جو مذہبی جذبات کوں ملک اچ تشدد بھڑکاوݨ کیتے استعمال کائناں تھیوݨ ݙتا ویسی۔ کہیں ٻئے ملک اچ پیش آوݨ آلے واقعات دی بنیاد تے پاکستان اچ تشدد ہرگز برداشت کائناں کیتا ویسی۔ علمائے کرام امن و استحکام دی خواہش دا اظہار کیتا تے مذہب دے ناں تے تشدد دی سخت ترین لفظاں اچ مذمت کیتی۔ انھاں ملک اچ امن و امان دے قیام کیتے قانون نافذ کرݨ آلے اداریں دی بھرپور حمایت دا یقین ݙوایا۔