جدید ٹیکنالوجی دا ودھارا صنعت، زراعت تے آئی ٹی دے شعبیں اچ سنگِ میل دی حیثیت رکھیندے، وزیراعظم دا ’فائیو-جی‘ سپیکٹرم دے لائسنساں دے اجراء دی تقریب توں خطاب

اسلام آباد۔ 19 مارچ (اے پی پی) وزیراعظم محمد شہباز شریف عوام کوں ٹیکنالوجی دی جدید سہولتاں ݙیوݨ دے عزم دا اعادہ کریندے ہوئے آکھیے جو جدید ٹیکنالوجی دا فروغ صنعت، زراعت تے آئی ٹی دے شعبیاں اچ سنگِ میل دی حیثیت رکھیندے، فائیو جی سپیکٹرم لائسنس دی نیلامی انتہائی شفاف انداز اچ کیتی ڳئی اے، چین تے پاکستان دی دوستی منفرد اے، دوستی دی ہک اہم جھلک اے جدید ٹیکنالوجی اے، نینگراں جدید ٹیکنالوجی توں فیدہ چا تے آئی ٹی شعبے اچ ملک دا ناں روشن کریسن۔ انھاں اے ڳالھ جمعرات کوں اتھاں ’فائیو-جی‘ سپیکٹرم دے لائسنساں دے اجراء دی تقریب توں خطاب کریندے آکھی۔ تقریب اچ وفاقی وزراء تے آئی ٹی دے شعبے دے ماہرین شرکت کیتی۔وزیراعظم فائیو جی سپیکٹرم دی کامیاب نیلامی تے وفاقی وزیرِانفارمیشن ٹیکنالوجی شزہ فاطمہ خواجہ تے انھاں دی پوری ٹیم تے لائسنس حاصل کرݨ آلے ٹیلی کام آپریٹرز کوں مبارکباد ݙتی تے آکھیا جو اے پاکستان اچ ٹیکنالوجی دے شعبے اچ ہک اہم پیش رفت اے، ٹیکنالوجی دا فروغ پاکستان دی صنعت، زراعت تے آئی ٹی دے شعبیں اچ سنگِ میل دی حیثیت رکھیندے۔ انھاں آکھیا جو حکومت ملک اچ عوام کوں ٹیکنالوجی دی جدید سہولتاں ݙیوݨ کیتے پرعزم اے، فائیو جی سپیکٹرم لائسنس دی انتہائی شفاف انداز اچ نیلامی کیتی ڳئی اے، ایندے توں پہلے پی آئی اے دی وی شفافیت دے نال نجکاری کیتی ڳئی ہئی۔ قانونی چیلنجاں کوں خوش اسلوبی نال حل کرݨ تے وفاقی وزیرِ قانون و انصاف اعظم نذیر تارڑ تے پوری ٹیم کوں مبارکباد ݙینداں۔انھاں آکھیا جو زونگ تے ٻئے شراکت دار ٹیلی کام آپریٹرز دے تعاون کوں وی چنڳاں آکھدوں ، امید اے جو او ملک دے کونے کونے اچ ایں ٹیکنالوجی کوں عوام تئیں پڄیسن۔ انھاں آکھیا جو چین تے پاکستان دی دوستی منفرد اے تے دوستی دی ہک اہم جھلک اے جدید ٹیکنالوجی اے۔ انھاں آکھیا جو نینگر اے آئی سمیت جدید ٹیکنالوجی توں فائدہ چا تے آئی ٹی شعبے اچ ملک دا ناں روشن کریسن۔ وفاقی وزیرِ انفارمیشن ٹیکنالوجی شزہ فاطمہ خواجہ نے آکھیا جو اے کامیابی وزیراعظم دی قیادت اچ مکمل ٹیم ورک توں ممکن تھئی اے، پاکستان اچ پہلی واری فائیو جی سروس متعارف کرائی ڳئی اے، شہریاں کوں بہترین فور جی سروسز ݙیوݨ کیتے وی اقدامات کیتے ویندے پئن۔انھاں آکھیا جو آوݨ آلے کجھ مہینے اچ مجموعی طور تے انٹرنیٹ دا معیار بہتر ہوسی، فائیو جی سپیکٹرم دی نیلامی اچ شفافیت کوں یقینی بݨایا ڳئے۔ پی ٹی اے دے چیئرمین میجر جنرل (ر) حفیظ الرحمان آکھیا جو پاکستان اچ موبائل فون ٹیکنالوجی دی ترقی دا آغاز 90ء دے ݙہاکے دے اوائل اچ تھیا، 2004ء توں 2025ء تئیں سپیکٹرم دے حوالے نال چار نیلامیاں کیتیاں ڳئیاں ہن، سپیکٹرم دی شفاف انداز اچ نیلامی تھئی اے تے لائسنس دا اجراء کیتا گئے، پاکستان خطے اچ سپیکٹرم دی استعداد دے حوالے نال پہلے نمبر تے آڳئے۔ تقریب اچ ٹیلی کام اتھارٹی تے ٹیلی کام آپریٹرز جاز، یوفون تے زونگ دے درمیان فائیو جی سپیکٹرم لائسنس کیتے دستخط کیتے ڳئے۔ لائسنس دے اجراء دے بعد تریہے کمپنیاں ملک اچ باقاعدہ طور تے 5 جی سروسز دا آغاز کر سڳسن جیندے نال صارفین کوں تکھی رفتار انٹرنیٹ تے جدید ڈیجیٹل سہولتاں میسرآسن تے ڈیجیٹل سروسز، کاروبار تے آن لائن معیشت کوں فروغ ملسی۔