حج 2026: پاکستانی عازمین دے ویزیاں دا اجرا مکمل، حج پروازاں 18 اپریل توں شروع تھیسن

اسلام آباد۔ 25 مارچ(اے پی پی) وفاقی وزارت مذہبی امور و بین المذاہب ہم آہنگی حج 2026 کیتے ہک وݙی کامیابی حاصل کیتی اے، جتھاں سرکاری سکیم دے تحت منتخب تھیوݨ والے ہک لکھ 20 ہزار عازمین دے ویزیاں دی منظوری دے فوری بعد حج پروازاں دے باقاعدہ شیڈول دا اعلان کر ݙتا ڳئے۔ سعودی حکومت ولوں مقررہ ساریاں ڈیڈ لائنز کوں ویلھے توں پہلے پورا کرݨ دے بعد، ہݨ پاکستان توں حج آپریشن دا باقاعدہ آغاز 18 اپریل توں تھیسی، جیندے تحت عازمینِ حج دی پہلی پرواز سعودی عرب کیتے اݙسی جݙاں جو روانگی دا اے سلسلہ21 مئی تئیں بغیر کہیں رکاوٹ دے جاری رہسی۔ وزارت مذہبی امور دے حکام دے مطابق ایں سال حج انتظامات اچ غیر معمولی تیزی ݙکھائی ڳئی اے، 17 فروری تئیں بائیو میٹرک دا عمل مکمل کرݨ دے فوراً بعد مکہ مکرمہ اتے مدینہ منورہ اچ رہائشی جاہیں، مکتب دی الاٹمنٹ اتے ٹرانسپورٹیشن ڄھیں اوکھے مراحل کوں حتمی شکل ݙتی ڳئی۔ شیڈول دے مطابق پاکستان توں سرکاری حج سکیم دے تحت 468 پروازاں تے عازمین کوں حجاز مقدس پچایا ویسی۔ 18 اپریل کوں کراچی، لاہور، سیالکوٹ اتے ملتان توں پروازاں روانہ تھیسن۔ پاکستان توں سرکاری سکیم دے تحت ہک لکھ 19 ہزار عازمین کوں مدینہ منورہ اتے مکہ مکرمہ پچایا ویسی۔ سرکاری سکیم دے تحت 67 ہزار 230 مرد عازمین کوں سعودی عرب پچایا ویسی، جݙاں جو 51 ہزار 846 خواتین عازمین حجاز مقدس ویسن۔ حج آپریشن دے پہلے ݙینہہ عازمین کوں چار پروازاں دے ذریعے مدینہ منورہ پچایا ویسی۔ جدہ کیتے چار مئی توں حج پروازاں دا آغاز کیتا ویسی۔ مدینہ منورہ کیتے پہلی لانگ حج پرواز ست مئی کوں چلسی۔ پاکستان توں آخری حج پرواز 21 مئی کوں روانہ تھیسی۔ عازمینِ حج کوں حجاز مقدس پچاوݨ دا آپریشن 34 ݙینہہ جاری رہسی۔ حج پروازاں دے آغاز تے پہلے 15 ݙینہہ عازمین کوں مدینہ منورہ پچایا ویسی۔ مدینہ منورہ کیتے 186 اتے جدہ کیتے 282 پروازاں چلائیاں ویسن۔ پی آئی اے، ائیر بلیو، ایئر سیال اتے سعودی فضائی کمپنی حج آپریشن اچ حصہ ڳھندیاں پئن۔ پاکستان دے اٹھ شہراں توں حج پروازاں چلائیاں ویسن۔ اسلام آباد توں 129، کراچی توں 124 اتے لاہور توں 104 پروازاں چلسن۔ کوئٹہ توں 18، ملتان توں 34 اتے سیالکوٹ توں 26 حج پروازاں روانہ تھیسن۔ فیصل آباد توں 23 اتے سکھر توں پنج حج پروازاں عازمین کوں سعودی عرب ڳھن ویسن۔ عازمینِ حج دی سہولت کیتے وزارت ڈیجیٹل نظام کوں ودھ فعال ٻݨیندے ہوئے ہدایت کیتی اے جو سارے عازمین اپݨی پرواز، روانگی دے ویلے تے متعلقہ ایئرپورٹ دی معلومات حاصل کرݨ کیتے “پاک حج 2026” موبائل ایپ دا استعمال کرن۔ اے ایپ نہ صرف پروازاں دی تازہ ترین صورتحال ݙسیسی ٻھل مکہ اتے مدینہ اچ رہائشی جاہیں دی لوکیشن اتے ٻئے ضروری اعلانات کیتے وی واحد مستند ذریعہ ہوسی۔ ایندے علاوہ ساریاں تفصیلات وزارت دی آفیشل ویب سائٹ تے وی دستیاب کر ݙتیاں ڳئن۔ وزارتِ مذہبی امور آکھیے جو عازمین سفرِ حج دی تیاریاں دے کیتے ویب سائٹ اتے موبائل ایپ دے نال مسلسل رابطے اچ راہون تاں جو مستقبل اچ ہووݨ والے کہیں وی تربیتی پروگرام یا شیڈول اچ ممکنہ تبدیلی توں ویلھے تے آگاہ رہ سکن۔ حکومتِ پاکستان آکھیے جو ہک لکھ 20 ہزار عازمینِ حج کوں سعودی عرب اچ بہترین سفری اتے رہائشی سہولتاں ݙتیاں ویسن تاں جو او پوری توجہ اتے سوکھ نال مناسکِ حج ادا کر سکن۔