کوئی سیاسی لیڈر پاکستان توں وݙا کائنی، ملکی مفاد سب توں مقدم اے، عطا اللہ تارڑ

اسلام آباد۔26 مارچ(اے پی پی) وفاقی وزیر اطلاعات و نشریات عطا اللہ تارڑ آکھیے جو کوئی سیاسی لیڈر پاکستان توں وݙا کائنی، ملک دے وقار کوں نقصان پچاوݨ ناقابلِ برداشت اے اتے پاکستان دے خلاف مہم چلاوݨ والے عناصر اتے انہاں دے سہولت کار بے نقاب تھی چکین۔ اسلام َباد اچ پی ٹی وی ہیڈ کوارٹرز اچ پریس کانفرنس کریندے ہوئیں وفاقی وزیر آکھیا جو مشرقِ وسطیٰ دی صورتحال اچ پاکستان دا ہک ثالث دے طور تے اہم کردار سامݨے آئے اتے اڄ پوری دنیا پاکستان دی سفارتی کوششاں دی تعریف کریندی پئی اے۔ انہاں آکھیا جو وزیراعظم شہباز شریف اتے فیلڈ مارشل سید عاصم منیر عالمی سطح تے پاکستان کوں ڄق اچ منوائے۔ عطا اللہ تارڑ آکھیا جو پاکستان دی ایں کامیابی نال بھارت ݙاݙھی بوکھلاہٹ دا شکار اے، جݙاں جو جنیوا اجلاس اچ وی افسوسناک ڳالھیں سامݨے آئن، بانی پی ٹی آئی دے پتر قاسم خان اتھاں ونڄ تے تقریر کیتی اے، پی ٹی آئی ملک دشمنی اچ اتنی اڳو تے نکل ڳئی اے جو پہلے آئی ایم ایف کوں امداد روکݨ دا آکھیے اتے ہݨ پاکستان دا جی ایس پی پلس (GSP+) سٹیٹس واپس کرواوݨ دی کوشش کیتی اے۔ انہاں آکھیا جو پی ٹی آئی دے لوک عارف آجاکیہ ڄھیں غداراں نال ملدن۔ زلفی بخاری دی عارف آجاکیہ نال ملاقات دیاں تصویراں وی ݙکھائیاں ڳئیاں۔ وفاقی وزیر آکھیا جو جتنا اے لوک ملک دے خلاف سازش کریسن، پاکستان اتنا ہی تکڑا تھیسی۔ انہاں یاد ݙوایا جو پی ٹی آئی 50 لکھ گھر اتے ہک کروڑ نوکریاں دا وعدہ کیتا ہئی، او کتھاں ڳئن؟ وفاقی وزیر آکھیا جو سیاست اچ اختلاف رائے تہاݙا حق اے، تساں حکومت تے تنقید کرو ٻھل ملک دے مفاد تے سمجھوتہ نہ کرو۔ انہاں آکھیا جو قومی مفاد ہمیشہ سب توں اتے ہوندے، اے عہدے اتے پارٹیاں سب ایں ملک دی وجہ توں ہین، جݙاں ذاتی مفاد کوں ملک تے ترجیح ݙتی ونڄے تاں ایندے توں بری حرکت ٻئی کوئی کائنی۔ عمران خان دے پتراں دے حوالے نال انہاں آکھیا جو انہاں کوں نائیکوپ (NICOP) دے ذریعے پاکستان آوݨ اچ شرمندگی تھیندی پئی اے، کیا حب الوطنی دا تقاضا ایہو اے؟ پی ٹی آئی ہمیشہ آکھیا جو انہاں دا لیڈر ملک توں وݙا اے۔ انہاں آئی ایم ایف کوں خط لکھے تاں جو ملک ڈیفالٹ تھی ونڄے، ٻھل الحمدللہ پاکستان ڈیفالٹ کائنی تھیا۔ عطا اللہ تارڑ آکھیا جو پی ٹی آئی اسرائیل دے مظالم دی کݙاہیں مذمت کائنی کیتی۔ انہاں آکھیا جو نسیم بلوچ جھئیں شدت پسنداں نال اے لوک ٻاہند۔ وفاقی وزیر آکھیا جو اساں ایں ملک دی وجہ توں ہیں۔ انہاں پروین شاکر دا شعر وی پڑھیا:

تہمت لگا کے ماں (وطن) پر جو دشمن سے داد لے

 ایسے سخن فروش کو مر جانا چاہئے

ہک سوال دے ولدے اچ انہاں آکھیا جو پی ٹی آئی دی سیاسی حیثیت موجودہ قوانین دے مطابق ختم تھی چکی اے۔ بانی پی ٹی آئی دے حوالے نال انہاں ݙسایا جو حکومت انہاں کوں مکمل طبی سہولیات ݙیندی پئی اے اتے انہاں دی اکھ وی ٹھیک تھیندی پئی اے۔ انہاں آکھیا جو بطور پاکستانی میݙی ذمہ داری ہئی جو حقائق قوم دے سامݨے رکھاں۔ پاکستان عالمی سطح تے اپݨا بھرپور کردار ادا کریندا رہسی۔