وفاقی وزیر داخلہ محسن نقوی دا چینی سفارت خانے دا دورہ

اسلام آباد۔ 27 مارچ(اے پی پی) وفاقی وزیر داخلہ محسن نقوی ڈپلومیٹک انکلیو اسلام آباد اچ چینی سفارت خانے دا دورہ کیتے، جتھاں سفیر جیانگ زیڈونگ انہاں دا استقبال کیتے۔ ملاقات اچ دہشت گردی دے خاتمے، سکیورٹی تعاون، پولیس ایکسچینج پروگرام اتے خطے دی مجموعی صورتحال سودھا آپسی دلچسپی دے اہم معاملیاں تے ڳالھ مہاڑ کیتی گئی۔ ݙوہائیں رہنماواں تعلقات کوں ٻیا تکڑا کرݨ اتے سکیورٹی چیلنجز نال نمٹݨ سانگے سانڄھی حکمتِ عملی ٻݨاوݨ تے اتفاق کیتے۔ ملاقات اچ پاکستان اچ موجود چینی سرمایہ کاراں دے سکیورٹی مسئلیاں کوں حل کرݨ اتے انہاں دا اعتماد بحال کرݨ سانگے ہک خاص ‘بزنس کانفرنس’ کرواوݨ دا فیصلہ وی کیتا گیا۔ ایں منصوبے کوں ݙو مرحلیاں اچ ونڈیا ڳئے۔ پہلے مرحلے اچ پاکستان اچ موجود چینی بزنس کمیونٹی نال ملاقاتاں تھیسن، ڄݙاں جو ݙوڄھے مرحلے اچ انہاں سرمایہ کاراں نال رابطہ کیتا ویسی جیڑھے پاکستان اچ نویں سرمایہ کاری کرݨ چاہندن۔ وزیر داخلہ چینی شہریاں دے تحفظ سانگے ‘سپیشل پروٹیکشن یونٹ’ ٻݨاوݨ دا اعلان وی کیتا۔ انہاں ݙسایا جو ایں یونٹ دے اہلکاراں کوں دورانِ ٹریننگ چینی زبان وی سکھائی ویسی تاں جو رابطے دا نظام بئی بہتر تھی سگے۔