آئی ایم ایف نال سٹاف لیول معاہدہ طے، پاکستان کوں ہک ارب ڈالر قرض ملݨ دی راہ ہموار

واشنگٹن ڈی سی۔ 28 مارچ(اے پی پی)عالمی مالیاتی ادارے (آئی ایم ایف) اتے پاکستان وچال سٹاف لیول معاہدہ طے پا ڳئے، جیںدے تحت حتمی منظوری دے بعد پاکستان کوں توسیعی فنڈ سہولت (EFF) دے تحت ہک ارب ڈالر اتے آر ایس ایف (RSF) دے تحت 21 کروڑ ڈالر مل سڳسن۔ آئی ایم ایف دے اعلامیے دے مطابق اے رقم ایگزیکٹو بورڈ دی منظوری دے بعد جاری کیتی ویسی۔ پاکستانی حکومت مالی نظم و ضبط برقرار رکھݨ اتے خسارہ ڳھٹ کرݨ دے عزم کوں دوہرایا۔ حکومت مالی سال 2026 کیتے 1.6 فیصد پرائمری سرپلس دا ہدف رکھیے۔ اعلامیے اچ آکھیا ڳئے جو مہنگائی ڳھٹ تھئی اے اتے زرمبادلہ دے ذخائر مستحکم تھئین۔ اسٹیٹ بینک مہنگائی تے قابو پاوݨ کیتے سخت مانیٹری پالیسی جاری رکھیسی۔ توانائی دے شعبے اچ اصلاحات، نجکاری اتے کرپشن دے خاتمے تے وی زور ݙتا ڳئے۔