نائب وزیراعظم محمد اسحاق ڈار تے چینی وزیرِ خارجہ دی ملاقات

اسلام آباد۔ 1 اپریل (اے پی پی) نائب وزیراعظم تے وزیرِ خارجہ سینیٹر محمد اسحاق ڈار تے چین دے وزیرِ خارجہ وانگ یی دی ملاقات وچ ݙوہیں رہنماواں مغربی ایشیا دی علاقائی صورتحال تے ݙو پاسے تعلقات تے ڳالھ مہاڑ کیتی ، فریقین علاقائی سکیورٹی دی صورتحال دا جائزہ ڳھدا تے ترقی پذیر ملکاں تے اوندے سنگین سماجی و معاشی اثرات تے ݙاڈھی تشویش دا اظہار کیتا۔ دفترِ خارجہ توں جاری بیان موجب نائب وزیراعظم و وزیرِ خارجہ سینیٹر محمد اسحاق ڈار چین دے وزیرِ خارجہ وانگ یی دی دعوت تے 31 مارچ توں یکم اپریل تائیں بیجنگ دا سرکاری دورہ کیتا۔ملاقات روایتی گرمجوشی تے خوشگوار ماحول وچ تھئی، ݙوہیں رہنماواں مغربی ایشیا دی علاقائی صورتحال تے ݙو پاسے تعلقات تے ڳالھ مہاڑ کیتی۔ نائب وزیراعظم تے وزیرِ خارجہ چینی وزیرِ خارجہ وانگ یی کوں پاکستان ولوں جھیڑے مکاوݨ تے مذاکرات دی بحالی کیتے جاری کوششاں دے بارے وچ تفصیل نال ݙسایا، جیندے وچ اسلام آباد وچ پاکستان، سعودی عرب، ترکیہ تے مصر دے وزرائے خارجہ دی اڄوکی ملاقات وی شامل اے۔ ݙوہیں فریقین علاقائی سکیورٹی دی صورتحال دا جائزہ ڳھدا تے ترقی پذیر ملکاں تے اوندے سنگین سماجی و معاشی اثرات تے ݙاڈھی تشویش دا اظہار کیتا۔ ایں تناظر وچ ݙوہیں ملکاں خلیج تے مشرقِ وسطیٰ وچ امن و استحکام دی بحالی کیتے پنج نکاتی اقدام دا آغاز کیتے۔بیان موجب وزیرِ خارجہ وانگ یی مغربی ایشیا وچ جھیڑے  مکاوݨ تے امن دے ودھارے کیتے پاکستان دے فعال سفارتی کردار تے کوششاں دی تعریف کیتی تے اپݨی حمایت دا اظہار کیتا۔ ݙوہیں وزرائے خارجہ ݙو پاسے تعلقات تے اطمینان دا اظہار کیتا تے سی پیک 2.0 دے تحت اعلیٰ معیار دی ترقی تے اسٹریٹجک تعاون دے ودھارے سودھے اعلیٰ سطحی رابطے تے تبادلے کوں مزید تکڑا بݨاوݨ تے زور ݙتا، خاص طور تے اوں سال جݙاں ݙوہیں ملکاں وچال سفارتی تعلقات دی 75 ویں سالگنڈھ منائی ویندی پئی اے۔ نائب وزیراعظم نے وزیرِخارجہ وانگ یی ولوں پرتپاک استقبال تے شاندار مہمان نوازی تے دلوں شکریہ ادا کیتا۔ ݙوہیں رہنماواں افغانستان دی صورتحال، امن و استحکام دی اہمیت تے دہشت گردی دے موثر خاتمے دی لوڑھ تے وی ڳالھ کیتی۔ بیان موجب ݙوہیں فریقین سانجھے رابطے باقاعدگی نال جاری رکھݨ تے اتفاق کیتا