پاکستان انفارمیشن ٹیکنالوجی دے شعبے وچ جدت تے بین الاقوامی سرمایہ کاری ودھاوݨ کیتے موثرتے جامع حکمتِ عملی دے تحت کم کریندا پئے، وزیراعظم شہباز شریف

اسلام آباد۔ 1 اپریل (اے پی پی) وزیراعظم محمد شہباز شریف ملک وچ ڈیجیٹل آپریٹرز انڈسٹری وچ سرمایہ کاراں کوں ہر ممکن سہولت ݙیوݨ دے عزم دا اظہار کریندے آکھیے پاکستان انفارمیشن ٹیکنالوجی دے شعبے وچ جدت تے بین الاقوامی سرمایہ کاری ودھاوݨ کیتے موثر تے جامع حکمتِ عملی دے تحت کم کریندا پئے۔ وزیراعظم محمد شہباز شریف نال عالمی ڈیجیٹل آپریٹر VEON گروپ دے چیف ایگزیکٹو افسر کان ترزی اوعلو وفد دے نال ملاقات کیتی۔ وزیراعظم دفتردے میڈیا ونگ توں جاری بیان موجب وزیراعظم وفد نال ڳالھ مہاڑ کریندے آکھیا حکومت ملک وچ ڈیجیٹل آپریٹرز انڈسٹری وچ سرمایہ کاراں کوں ہرممکن سہولت ݙیوݨ کیتے پرعزم اے۔ پاکستان وچ اڄوکے5 جی سپیکٹرم دی کامیاب نیلامی ایں شعبے وچ جدت کیتے اساݙی مثبت تے موثر سمت دا ثبوت اے۔ وزیراعظم آکھیا پاکستان معیشت دے شعبے وچ ڈیجیٹلائزیشن کوں اپنیندے ہوئیں شفافیت یقینی بݨاوݨ چاہندے ۔ ملک وچ ٹیلی کام آپریٹرز کوں 5 جی سپیکٹرم دی نیلامی دے بعد عوام کوں معیاری انٹرنیٹ سروسز ݙیوݨ کیتے سارے متعلقہ ادارے سانجھا تعاون تے ہم آہنگی نال کم کریندے پئن ۔ پاکستان دی جوان آبادی انفارمیشن ٹیکنالوجی تے ڈیجیٹل پلیٹ فارمز تے تعمیری شرکت نال ملک دی معیشت تے ٻئی معیاری سروسز ݙیوݨ وچ کلیدی کردار ادا کرسڳدی اے۔ پاکستان دی جوان آبادی دا ٹیلی کام تے انفارمیشن ٹیکنالوجی وچ رجحان بین الاقوامی سرمایہ کاراں کیتے دلچسپی دا باعث اے۔ وزیراعظم آکھیا پاکستان انفارمیشن ٹیکنالوجی دے شعبے وچ جدت کوں اپناوݨ تے بین الاقوامی سرمایہ کاری ودھاوݨ کیتے موثر تے جامع حکمتِ عملی دے تحت کم کریندا پئے۔ وفاقی حکومت بین الاقوامی سرمایہ کاراں دی سہولت تے سوکھ کیتے سارے اداریں دے سانجھے تعاون نال عملی اقدامات کریندی پئی اے۔ انہاں آکھیا کیش لیس معیشت دے حصول کیتے انفارمیشن ٹیکنالوجی دا موثر استعمال حکومت دی ترجیحات وچ شامل اے۔ عالمی ڈیجیٹل آپریٹر VEON گروپ دے چیف ایگزیکٹو افسر کان ترزی اوعلو آکھیا وزیراعظم پاکستان سارے شعبیں وچ شفافیت تے سرمایہ کاری ودھاوݨ کیتے ٻہوں موثر اقدامات کیتے، پاکستان ڈیجیٹل اکانومی دے حصول تے 5 جی سپیکٹرم دی نیلامی وچ ٻہوں تکھے کم کیتے جیڑھا جو تعریف دے لائق اے۔ کان ترزی اوعلو کیش لیس اکانومی تے معیشت دی مکمل ڈیجیٹلائزیشن کیتے وزیراعظم دی نگرانی وچ حکومت دی طرفوں کیتے ڳئے اقدامات دی تعریف کیتی۔ انہاں اپݨی کمپنی دی طرفوں پاکستان وچ مزید سرمایہ کاری ودھاوݨ دے ارادے دا وی اظہار کیتا۔ ملاقات وچ وفاقی وزیر خزانہ محمد اورنگزیب، وفاقی وزیرانفارمیشن ٹیکنالوجی شزا فاطمہ خواجہ، وفاقی وزیر اقتصادی امور احد خان چیمہ، جیز ورلڈ دے چیف ایگزیکٹو افسر عامر ابراہیم تے ٻئے متعلقہ سرکاری افسراں شرکت کیتی۔