وفاقی وزیر رانا تنویر حسین دی صدارت وچ اجلاس، قومی غذائی تحفظ کوں تکڑا بݨاوݨ دے اقدامات دا جائزہ ڳھدا ڳیا

اسلام آباد۔ 1 اپریل (اے پی پی) وفاقی وزیر قومی غذائی تحفظ و تحقیق رانا تنویر حسین دی صدارت وچ “نیشنل ویٹ اوور سائیٹ کمیٹی” دا اجلاس تھیا جیندے وچ کݨک دی خریداری دے انتظامات، صوبیں وچال رابطہ کاری تے بدلدے عالمی حالات دے تناظر وچ قومی غذائی تحفظ کوں تکڑا بݨاوݨ دے اقدامات دا جائزہ ڳھدا ڳیا۔ وفاقی وزیر آکھیا اڄوکے جغرافیائی سیاسی کشیدگی تے مشرقِ وسطیٰ دی صورتحال عالمی خوراک دی سپلائی چین دی کمزوری کوں ظاہر کر ݙتے۔ انہاں ایں ڳالھ تے زور ݙتا جو بین الاقوامی تجارتی رستیں وچ ممکنہ رکاوٹاں، مال برداری دے ودھدے غیر یقینی حالات تے عالمی منڈیاں وچ لہہ چڑھ ایں ڳالھ دا تقاضا کریندن جو پاکستان اپݨے اندرلے زرعی نظام کوں تکڑا کرے، سٹریٹجک ذخیرے دے انتظام کوں بہتر بݨاوے تے ضروری اجناس دی ویلھے تے خریداری یقینی بݨاوے۔اجلاس وچ مختلف صوبیں وچ جاری کݨک دی خریداری دے عمل دا جائزہ ڳھدا ڳئے جیندے وچ خریداری دے نظام دی ویلھے تے تیاری، فصل دی کٹائی دے دوران منڈی دے استحکام تے کساناں کوں تلویں سطح تے سہولت ݙیوݨ دے بارے خصوصی توجہ ݙتی ڳئی۔ وفاقی وزیر زور ݙتا خریداری دے نظام کوں شفاف، موثر تے ہر لحاظ نال ہر کہیں دی پہنچ وچ بݨایا ونڄے تاں جو کݨک پیدا کرݨ آلے سارے علاقیں دے کسان ایندے توں بلا تاخیر تے بلا تفریق فیدہ چا سڳن۔ اجلاس وچ کساناں دے مفاد دے تحفظ کوں بنیادی اہمیت حاصل رہی۔ وفاقی وزیر خبردار کیتا خریداری دے نظام وچ دیر تھیوݨ نال منڈی وچ وڳاڑ آ سڳدے تے درمیانی عناصر (آڑھتی) قیمتاں دے فرق توں فیدہ چا سڳدن جیندے نال کساناں کوں سدھا نقصان تھیسی۔ انہاں متعلقہ اداریں کوں ہدایت ݙتی خریداری دے سارے نظام، خاص طور تے فصل دی کٹائی دے اہم ویلھے وچ، مکمل طور تے فعال رہن۔کمیٹی کݨک دی پیداوار وچ لمبی مدت دے اضافے کیتے اقدامات تے وی غور کیتا۔ وفاقی وزیر بہتر تے تصدیق شدہ بج دے استعمال، متوازن کھاد دے استعمال کوں ودھاوݨ تے جدید زرعی مشینری جیویں لیزر لیولنگ، جدید طریقۂ کاشت تے بہتر کٹائی دے نظام کوں ودھاوݨ تے زور ݙتا، انہاں اقدامات کوں فی ایکڑ پیداوار وچ ودھارے تے قومی غذائی تحفظ دے استحکام کیتے لازمی قرار ݙتا۔ وفاقی وزیر زرعی توسیعی خدمات، کساناں وچ آگاہی مہمات تے زرعی وسائل دی ویلھے تے دستیابی کیتے وفاق تے صوبیں وچال مربوط تعاون دی اہمیت تے وی زور ݙتا۔ انہاں آکھیا پالیسیاں کوں عملی نتیجے وچ بدلݨ کیتے ادارہ جاتی ہم آہنگی ٻہوں ضروری اے، خاص طور تے موسمیاتی تبدیلیاں تے عالمی سپلائی چین دے دباؤ دے تناظر وچ۔ صوبائی نمائندیں اجلاس کوں اپݨے اپݨے صوبیں وچ جاری خریداری دے انتظامات تے کساناں دی مدد دے اقدامات دا ݙسایا۔ وفاقی وزیر سارے صوبیں دی سانجھیاں کوششاں دی تعریف تے ایں عزم دا اعادہ کیتا جو وفاقی حکومت کݨک دی خریداری دے نظام کوں مستحکم بݨاوݨ کیتے ہرممکن تکنیکی تے پالیسی مدد ݙیندی رہسی۔ انہاں آکھیا کݨک پاکستان دے غذائی تحفظ دی سٹریٹجک فصل اے، عالمی غیر یقینی صورتحال دے پیشِ نظر پاکستان کوں خود کفالتی دی پالیسی اپناوݨی پوسی، اپݨی اندرلی پیداوار دے نظام کوں تکڑا بݨاوݨا ہوسی تے ضروری اجناس دے موثر انتظام کوں یقینی بݨاوݨا ہوسی ۔ انہاں دا آکھݨ ہئی خریداری دے نظام کوں مزید موثر بݨایا ویسی، صوبائی رابطہ کاری کوں بہتر کیتا ویسی تے زرعی شعبے وچ پیداوار ودھاوݨ کیتے اصلاحاتی اقدامات کوں تکھا کیتا ویسی تاں جو قومی غذائی تحفظ کوں یقینی بݨایا ونڃ سڳے۔