تکھے ودھدی آبادی ہک سنگین قومی چیلنج اے، سید مصطفیٰ کمال

اسلام آباد۔ 1 اپریل (اے پی پی) وفاقی وزیر صحت سید مصطفیٰ کمال آکھیے تکھے ودھدی آبادی ہک سنگین قومی چیلنج بݨ چکی اے جیندے نال صحت، تعلیم، انفراسٹرکچر تے روزگار دے شعبے ݙاڈھے دٻاؤ دا شکار ہن۔ ملک وچ ہر سال تقریباً 62 لکھ لوکاں دا ودھارا تھیندا پئے جیڑھا جو نیوزی لینڈ دی کل آبادی توں وی زیادہ اے۔ اے ڳالھ انہاں ہک اہم اجلاس اچ آکھی جیندے اچ مشیر وزیر خزانہ عدنان پاشا، سیکرٹری صحت تے ڈی جی ہیلتھ وی شریک ہن۔ وزیر صحت آکھیا پاکستان ایں ویلھےدنیا دا پنجواں وݙا آبادی آلا ملک اے تے جے اے رفتار رہی تاں اڳلے پنج سال وچ اساں انڈونیشیا توں وی اڳوں نکل ویسوں ۔ انہاں آکھیا جے آبادی تے قابو نہ پاتا ڳیا تاں ترقی دا خواب پورا کائناں تھی سڳسی، ایں کیتے شرحِ پیدائش کوں 3.6 توں گھٹ کرتے 2.0 تے گھن آوݨ ٻہوں ضروری اے۔ انہاں بنگلہ دیش، انڈونیشیا تے ایران دی مثال ݙتی جنہاں آبادی وچ توازن پیدا کیتے۔ مشیرِ خزانہ یقین ݙیوایا وزارتِ خزانہ ایں سلسلے وچ ہر ممکن مالی مدد کریسی