حکومت معیشت دے استحکام و ترقی تے عوامی فلاح و بہبود کیتے سارے ضروری اقدامات عزم دے نال جاری رکھیسی، وزیراعظم شہباز شریف

اسلام آباد۔ 1 اپریل (اے پی پی) وزیراعظم محمد شہباز شریف عالمی منڈی وچ قیمتاں وچ ودھارے دے رجحان دی وجہ توں ملک تے معاشی تے مالیاتی اثرات نال نبٹݨ کیتے درمیانی تے لمبی مدت دی جامع حکمتِ عملی بݨاوݨ دی ہدایت کریندے ہوئیں آکھیے حکومت معیشت دے استحکام و ترقی تے عوامی فلاح و بہبود کیتے سارے ضروری اقدامات عزم دے نال جاری رکھیسی ۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف دی زیرِ صدارت خطے دی کشیدہ صورتحال دے پیشِ نظر ملک کوں مالیاتی تے معاشی اثرات توں بچاوݨ کیتے جامع لائحہ عمل بݨاوݨ دے حوالے نال جائزہ اجلاس تھیا ۔وزیراعظم سارے متعلقہ وزارتاں تے اداریں ولوں اڄوکی صورتحال دے معاشی اثرات نال نبٹݨ کیتے رل مل تے چاتی ڳئی کوششاں دی تعریف کیتی تے ایں تعاون کوں مزید موثر بݨاوݨ دی ہدایت کیتی۔انہاں آکھیا دنیا دے کئی ملکاں کوں اڄوکی صورتحال دے تناظر وچ ضروری چیزاں دی طلب تے رسد دا توازن برقرار رکھݨ وچ مشکل تھیندی پئی اے، الحمدللہ پاکستان ایں مشکل صورتحال کوں وݙی کامیابی تے موثر طریقے نال حل کریندا پئے ، سارے اداریں ضروری چیزاں دی سپلائی وچ کہیں وی ہنگامی صورتحال کوں روکݨ کیتے ویلھے تے اقدامات کیتن جیڑھے جو تعریف دے لائق ہن۔ وزیراعظم آکھیا پاکستان وچ کھاوݨ پیوݨ دیاں چیزاں دی ملکی ضرورت پوری کرݨ دے بعد ودھ مقدار کوں ٻاہرلے ملکاں بھیجݨ کیتے جامع حکمتِ عملی تے کم کامیابی نال جاری اے، حکومت ملکی معیشت دے استحکام تے عوامی بھلائی کیتے سارے ضروری اقدامات جاری رکھیسی ۔وزیراعظم ہدایت کیتی عالمی منڈی وچ قیمتاں ودھݨ دے اثرات نال نبٹݨ کیتے درمیانی تے لمبی مدت دی حکمتِ عملی بݨائی ونڄے۔ وزارتاں رل تے ایجھی پالیسی بݨاون جیڑھی معیشت دے سارے شعبیں کوں سامݨے رکھے، پیداواری لاڳت ودھݨ نال ایکسپورٹ تے مجموعی پیداوار تے اثرات کوں گھٹ توں گھٹ کرݨ کیتے موثر اقدامات تجویز کیتے ونڄن، تے زراعت و صنعت دی پیداوار کوں متاثر تھیوݨ توں روکݨ کیتے سارے ذرائع کوں استعمال کیتا ونڄے۔ اجلاس کوں ݙسایا ڳیا ساریاں وزارتاں روز دی بنیاد تے معاشی اثرات دا جائزہ گھندیاں پئن۔ وزیراعظم آکھیا حکمتِ عملی ایجھی ہووے جیڑھی پیداوار تے طلب و رسد دے توازن کوں متاثر نہ کرے۔ وزیراعظم اوکھی صورتحال دے باوجود پاکستان وچ ضروری چیزاں دی فراہمی دا توازن قائم رکھݨ تے شکر ادا کیتا۔ اجلاس وچ وفاقی وزراء احسن اقبال، محمد اورنگزیب، اویس لغاری، عطاء اللہ تارڑ، مصدق ملک، رانا تنویر، علی پرویز ملک، احد چیمہ، ہارون اختر، گورنر اسٹیٹ بینک جمیل احمد تے ٻئے حکام شریک ہن