سکیورٹی فورسز پاک افغان سرحد دے نال شمالی وزیرستان اچ بھارتی حمایت یافتہ فتنہ خوارج دے 8 دہشت گرداں کوں ہلاک کرݙتا، آئی ایس پی آر

راولپنڈی۔ 2 اپریل (اے پی پی) سکیورٹی فورسز پاک افغان سرحد دے نال شمالی وزیرستان اچ دراندازی دی کوشش ناکام بݨیندے بھارتی حمایت یافتہ فتنہ خوارج دے 8 دہشت گرداں کوں ہلاک کر ݙتے ۔ آئی ایس پی آر توں جاری بیان موجب یکم اپریل کوں سکیورٹی فورسز ضلع شمالی وزیرستان اچ پاک افغان سرحد دے نال خوارج دے ہک گروہ دی نقل و حرکت دا مشاہدہ کیتا۔ سکیورٹی فورسز ایں گروہ کوں موثر طریقے نال نشانہ بݨائے۔ ایں درست تے مہارت نال بھری کارروائی دے نتیجے اچ بھارتی پراکسی، فتنہ الخوارج نال تعلق رکھݨ آلے 8 خوارج کوں ہلاک کرݙتا ڳئے۔ ہلاک تھیوݨ آلے بھارتی حمایت یافتہ خوارج توں اسلحہ تے گولہ بارود وی برآمد کیتا ڳئے۔آئی ایس پی آر آکھیے جو اے کارروائی ہک واری ول ایں موقف کوں ثابت کریندی اے جو افغان طالبان حکومت اپݨی طرفوں سرحد دے موثر انتظام کوں یقینی بݨاوݨ اچ ناکام رہی اے۔ افغان طالبان حکومت کوں اپݨیاں ذمہ واریاں پوریاں کریندے ہوئیں افغان سرزمین کوں خوارج دے استعمال توں روکݨا ہوسی تے اپݨے شہریاں کوں پاکستان اچ دہشت گردی اچ ملوث تھیوݨ توں باز رکھݨا ہوسی۔ پاکستان دی سکیورٹی فورسز ملکی سرحداں دے دفاع کیتے اپݨے عزم تے قائم تے غیر متزلزل اے۔ علاقے اچ مزید کہیں وی بھارتی حمایت یافتہ خارجی دے خاتمے کیتے کلیئرنس آپریشن جاری اے۔ نیشنل ایکشن پلان دے تحت وفاقی ایپکس کمیٹی توں منظور شدہ “عزمِ استحکام” دے وژن دے تحت سکیورٹی فورسز تے قانون نافذ کرݨ آلے اداریں دی طرفوں جاری انسدادِ دہشت گردی مہم پوری شدت نال جاری رہسی تاں جو ملک توں ٻاہرلی سرپرستی یافتہ دہشت گردی دے ناسور دا مکمل خاتمہ کیتا ونڄ سڳے