وفاقی وزیرداخلہ دا اسلام آباد دے مختلف منصوبیں دا دورہ، اتاترک ایونیو توسیعی منصوبے دا سنگِ بنیاد رکھیا

اسلام آباد۔ 2 اپریل (اے پی پی) وفاقی وزیر داخلہ محسن نقوی عوامی خدمت دے مشن دے تحت دارالحکومت اچ جاری مختلف ترقیاتی تے سکیورٹی منصوبیں دا تفصیلی دورہ کیتا ۔ 4 گھنٹے لمبے ایں دورے دے دوران وزیرِ مملکت داخلہ طلال چوہدری، ڈی جی ایف آئی اے ڈاکٹر عثمان انور تے آئی جی اسلام آباد وی انہاں دے نال ہن ۔ وزیر داخلہ اتاترک ایونیو دے توسیعی منصوبے دا باقاعدہ سنگِ بنیاد رکھیا ۔ انہاں زیرِ تعمیر ماڈل جیل دا جائزہ ڳھدا جتھاں بیرکس تے ایڈمن بلاک دا کم تقریباً مکمل تھی چکئے ۔ محسن نقوی ہدایت کیتی جو جیل دے پہلے فیز کوں “ہائی سکیورٹی پریزن” بݨایا ونڄے تے عملے دی تربیت 30 اپریل تائیں مکمل کیتی ونڄے۔وزیر داخلہ پولیس کالج دی اپ گریڈیشن دا پلان طلب منڳدے ہوئیں تربیتی گنجائش 450 توں ودھا تے 4000 کرݨ دا ٹاسک ݙتا ۔ انہاں تربیت اچ اے آئی (AI) تے آئی ٹی کوں شامل کرݨ دی ہدایت ݙتی تے 2 آرمرڈ پرسنل کیریئر گاݙیاں پولیس دے حوالے کیتیاں ۔ وفاقی وزیر داخلہ ایف سکس اچ خدمت مرکز دا معائنہ کیتا تے اتھاں موجود شہریاں نال ملاقات کرتے مسئلے پچھئے۔ انہاں ہدایت کیتی جو شہریاں کوں شفاف تے تکھی رفتار سہولتاں ݙیوݨ حکومت دی اولین ترجیح اے۔ وزیر داخلہ واضح کیتا جو شہریاں دی سہولت کیتے حکومتی سطح تے کوششاں جاری رہسن تاں جو سروس ڈیلیوری دے نظام کوں مزید بہتر بݨایا ونڄ سڳے۔