بجلی دی کھپت اچ ہولے ہولے تے نمایاں ودھارا حکومتی پالیسیاں دی کامیابی دا ثبوت اے، سردار اویس احمد خان لغاری

اسلام آباد۔ 2 اپریل (اے پی پی) وفاقی وزیر توانائی سردار اویس احمد خان لغاری آکھیے جو ملک اچ بجلی دی کھپت اچ ہولے ہولے تے نمایاں ودھارا تھیندا پئے جیڑھا حکومتی پالیسیاں دی کامیابی دا ثبوت اے۔ انہاں اے ڳالھ ورلڈ بینک دی کنٹری ڈائریکٹر بولورما امگابازار کوں آکھی جنہاں نہاں نال ملاقات کیتی اے۔ وفاقی وزیر آکھیا جو حکومت بجلی دے نرخاں کوں مسابقتی بݨاوݨ کیتے کوششاں کریندی پئی اے تاں جو ملک دے اہم معاشی شعبے ایندے توں فیدہ چا سڳن ۔ انہاں آکھیا جو پاور ڈویژن صنعتی شعبے کیتے رعایتی ٹیرف دا جائزہ گھنݨ دے بعد ہݨ “ٹائم آف یوز” تجویزاں تے کم شروع کر ݙتے تاں جو توانائی دے شعبے اچ مزید بہتری گھن آئی ونڄ سڳے، ایندا مقصد ملک دی شمسی توانائی دی صلاحیت توں فیدہ چیندے صنعتاں کوں رعایتی نرخ ݙیوݨ اے، ایں حوالے نال سارے اسٹیک ہولڈرز نال مشاورت جاری اے۔سردار اویس احمد خان لغاری آکھیا جو پاور ڈویژن بجلی دی پیداوار کیتے ملک دے مقامی وسائل دے استعمال متعلق اہم پالیسی فیصلیں تے وی غور کریندا پئے۔ انہاں آکھیا جو مشرقِ وسطیٰ دی موجودہ صورتحال مقامی وسائل دے استعمال دی حکومتی کوششاں کوں مزید تکڑا کیتے ۔وفاقی وزیر توانائی دے شعبے اچ مسلسل تعاون تے ورلڈ بینک دا شکریہ ادا کیتا تے جاری منصوبیں دے کامیاب نفاذ دی تعریف کیتی ۔ انہاں حکومت دے ایں عزم دا اظہار کیتا جو پاکستان دے توانائی دے بنیادی ڈھانچے کوں مزید تکڑا بݨاوݨ کیتے عالمی بینک دے نال نیڑے تعاون جاری رکھیا ویسی ۔ ورلڈ بینک دی کنٹری ڈائریکٹر بولورما امگابازار پاور ڈویژن دے اصلاحاتی ایجنڈے دی تعریف کیتی تے ٹیرف ریشنلائزیشن، ٹرانسمیشن و ڈسٹری بیوشن نیٹ ورک تے قابلِ تجدید توانائی دے انضمام سودھے ترجیحی شعبیں اچ وزارت دے نال تعاون جاری رکھݨ دے عزم دا اعادہ کیتا۔