بے نظیر انکم سپورٹ پروگرام دی دنیا معترف اے، ڈاکٹر طارق فضل چوہدری

اسلام آباد۔ 2 اپریل (اے پی پی)وفاقی وزیر پارلیمانی امور ڈاکٹر طارق فضل چوہدری آکھیے بے نظیر انکم سپورٹ پروگرام دی دنیا معترف اے، غربت مکاوݨ کیتے کم کرݨ آلے سارے ادارے ہم آہنگی نال اڳوں ودھدے پئن، انھاں پروگراماں اچ رجسٹرڈ سارے لوکاں دے اعداد و شمار خفیہ رکھئے ویندن، انھاں کوں عام عوام کوں کائنی ݙتا ویندا۔ قومی اسمبلی اچ سوالاں دے وقفے اچ محمد الیاس چوہدری دے سوال دے جواب اچ طارق فضل چوہدری ݙسایا جو وزارت توں موصول تھیوݨ آلے اعداد و شمار درست ہن، بے نظیر انکم سپورٹ پروگرام دی دنیا معترف اے، آئی ایم ایف وی ایندی تعریف کریندے ، ہک کروڑ لوکاں دی ہنرمند پروگرام توں کفالت پروگرام اچ ہر ترائے سال بعد ری سرٹیفیکیشن کیتی ویندی اے، 40 لکھ لوک ایندے توں نکلئن تے اتنے مزید شامل تھئے، ایں سروے اچ سوالات پچھے ویندن، اتھاں 32 نمبر رکھئے ویندن، خصوصی لوکاں کیتے ایندے اچ پنج نمبر زیادہ جݙاں جو ٹرانس جینڈر اچ سو فیصد رجسٹریشن اے۔انھاں ݙسایا جو بی آئی ایس پی دے تحت ترائے کروڑ 80 لکھ لوک رجسٹرڈ ہن، پاکستان پاورٹی ایلی وییشن فنڈ، بیت المال تے بی آئی ایس پی غربت دے خاتمے کیتے کم کریندن، پاکستان پاورٹی ایلی وییشن فنڈ توں 5 ارب روپے دے بلا سود قرضے ݙتے ویندے پئن، رمضان اچ 38 ارب روپے دا پیکیج ݙتا ڳیا، ایندے اچ بی آئی ایس پی دے رجسٹرڈ لوک شامل کائناں ہن۔ انھاں ݙسایا جو غربت مکاوݨ دے سارے ادارے ہک ٻئے نال اپݨا ڈیٹا شیئر کریندن۔ انھاں آکھیا جو بی آئی ایس پی دے رجسٹرڈ خانداناں کوں ترائے سال بعد پرکھیا ویندے، ایندے کیتے ہک عالمی معیار اے۔ ڈاکٹر نفیسہ شاہ دے سوال دے جواب اچ انھاں ݙسایا جو 716 ارب روپے سالانہ ایں پروگرام کوں ݙتے ویندن، ایندے اچ مزید ودھارے کیتے کوشاں ہیسے۔