پاکستان تے آئی ایف اے ڈی (IFAD) وچال زرعی ترقی، غذائی تحفظ تے دیہی خوشحالی دے ودھارے کیتے تعاون مزید تکڑا بݨاوݨ تے اتفاق

اسلام آباد۔ 2 اپریل (اے پی پی) وفاقی وزیر قومی غذائی تحفظ و تحقیق رانا تنویرحسین دی صدارت اچ ہک اعلیٰ سطحی اجلاس منعقد تھیا، جیندے اچ بین الاقوامی فنڈ زرعی ترقی (آئی ایف اے ڈی) دے وفد شرکت کیتی اے۔ وفد دی قیادت فرنینڈا تھوماز دا روچا، کنٹری ڈائریکٹر (ایشیا) کریندیاں پئیاں ہن جݙاں جو کنٹری پروگرام کوآرڈینیٹر غلام نبی مری وی انھاں دے نال ہن ۔ اجلاس اچ پاکستان اچ پائیدار زرعی ترقی، دیہی معیشت دی بہتری تے غربت مکاوݨ کیتے سانجھا تعاون مزید وسعت ݙیوݨ تے تفصیلی ڳالھ مہاڑ کیتی ڳئی اے۔وفاقی وزیر رانا تنویر حسین آکھیا جو پاکستان آئی ایف اے ڈی دے نال اپݨی پراݨی شراکت داری کوں ٻہوں اہمیت ݙیندے جیڑھی 1979 توں جاری اے تے وقت دے نال ہک تکڑے تے موثر ترقیاتی تعاون اچ بدل چکی اے۔ انھاں آئی ایف اے ڈی دی طرفوں پاکستان دے مختلف دیہی علاقیں اچ کیتے ونڄݨ آلے ترقیاتی اقدامات دی تعریف کیتی جنھاں لکھاں لوکاں دی زندگیاں تے مثبت اثرات پاتن۔ انھاں خصوصاً گلگت بلتستان تے سندھ دے ساحلی ضلعیں سجاول، بدین تے ٹھٹھہ اچ آئی ایف اے ڈی دے منصوبیں کوں دیہی ترقی دے اہم ماڈلز قرار ݙتے۔ وفاقی وزیر روم دے اپݨے اڄوکے دورے دا حوالہ ݙیندے آکھیا جو آئی ایف اے ڈی دی قیادت نال انھاں دی ملاقاتاں ٻہوں مفید تے نتیجہ خیز رہیاں ۔ انھاں ایں ڳالھ تے زور ݙتا جو پاکستان دے زرعی شعبے کوں درپیش چیلنجز خصوصاً موسمیاتی تبدیلی، پاݨی دی کمی تے جدید زرعی ٹیکنالوجی دی ضرورت دے پیشِ نظر آئی ایف اے ڈی دی مالی تے تکنیکی معاونت کوں مزید وسعت ݙیوݨ ناگزیر اے۔انھاں دیہی معیشت دی مضبوطی، ویلیو چین دی ترقی تے جدید و موسمیاتی لحاظ نال محفوظ زرعی طریقیں دے ودھارے کیتے نویں منصوبیں دے آغاز اچ دلچسپی دا اظہار کیتے۔ رانا تنویر حسین آئی ایف اے ڈی دی ایں سٹریٹجک ترجیح دی تعریف کیتی جیندے تحت چھوٹے کاشتکاراں کوں بااختیار بݨایا ویندے، دیہی نینگراں کیتے روزگار دے موقع پیدا کیتے ویندن تے موسمیاتی خطرات دے مقابلے اچ دیہی معیشت دی مضبوطی کوں یقینی بݨایا ویندا اے۔ کنٹری ڈائریکٹر (ایشیا) آئی ایف اے ڈی فرنینڈا تھوماز دا روچا آکھیا جو پاکستان ادارے کیتے ٻہوں اہم شراکت دار ملک اے تے آئی ایف اے ڈی دے عالمی پورٹ فولیو اچ کلیدی حیثیت رکھیندے ۔ انھاں ݙسایا جو آئی ایف اے ڈی ایں ویلھے پاکستان اچ ٻہوں سارے ترقیاتی منصوبیں تے کم کریندا پئے تے حکومتِ پاکستان دے نال رل تے دیہی ترقی دے مختلف اقدامات دی مالی و تکنیکی معاونت کریندا پئے۔ انھاں آکھیا جو آئی ایف اے ڈی دا بنیادی فوکس زرعی پیداوار اچ اضافہ، کساناں کوں منڈیاں تائیں بہتر رسائی ݙیوݨ، دیہی نینگراں کیتے روزگار تے کاروباری موقع پیدا کرݨ تے موسمیاتی تبدیلی دے اثرات دے خلاف دیہی علاقیں دی مزاحمت کوں تکڑا بݨاوݨ اے۔کنٹری پروگرام کوآرڈینیٹر غلام نبی مری جاری منصوبیں خصوصاً نیشنل پاورٹی گریجویشن پروگرام (این پی جی پی) دی پیشرفت تے تفصیلی بریفنگ ݙتی ۔ پاکستان ایگریکلچرل ریسرچ کونسل (پی اے آر سی) دے چیئرمین وی اجلاس اچ شرکت کیتی تے آئی ایف اے ڈی دے نال سینٹر آف ایکسیلنس دے تحت تعاون ودھاوݨ دی تجویز پیش کیتی اے۔ اجلاس دے چھیکڑ اچ حکومتِ پاکستان تے آئی ایف اے ڈی وچال ایں عزم دا اعادہ کیتا ڳیا جو سانجھے تعاون کوں مزید تکڑا بݨایا ویسی تاں جو پائیدار زرعی ترقی، غذائی تحفظ تے دیہی خوشحالی دے اہداف حاصل کیتے ونڄ سڳن۔