محض معاہدے دی بنیاد تے ملکیت دا دعویٰ ثابت کائنی کیتا ونڄ سڳدا، سپریم کورٹ آف پاکستان

اسلام آباد۔ 3 اپریل (اے پی پی) سپریم کورٹ قرار ݙتے جو محض معاہدے دی بنیاد تے جائیداد دی ملکیت دا دعویٰ ثابت کائنی کیتا ونڄ سڳدا۔ سپریم کورٹ دی طرفوں رپورٹنگ کیتے منظور شدہ تحریری تفصیلی فیصلے موجب سپریم کورٹ اسلام آباد دے سیکٹر E-12 اچ واقع پلاٹ متعلق 26 سالہ پراݨے جھیڑے دا فیصلہ سݨیندے مدعی دا دعویٰ خارج کر ݙتے۔ چیف جسٹس یحییٰ آفریدی تے جسٹس شاہد بلال حسن تے مشتمل بینچ اسلام آباد ہائی کورٹ دا فیصلہ کالعدم قرار ݙتا جݙاں جو جسٹس شاہد بلال حسن کیس دا تحریری فیصلہ جاری کیتے۔سپریم کورٹ اپݨے فیصلے اچ قرار ݙتا جو قانونِ شہادت دے تحت معاہدے دے گواہیں کوں عدالت اچ پیش کرݨ لازمی اے تے جے مدعی گواہ پیش نہ کرے تاں عدالت ایندے توں منفی تاثر گھنسی ۔ عدالت مزید آکھیا جو گواہ پیش نہ کرݨ دا مطلب اے تصور کیتا ونڄ سڳدے جو گواہ مدعی دے مؤقف دے حق اچ کائنی۔ فیصلے اچ آکھیا ڳیا جو عدالت محض ایں بنیاد تے ریلیف ݙیوݨ دی پابند کائنی جو دعویٰ بظاہر قانون موجب ہووے بلکہ مقدمے دے سارے حالات و واقعات کوں سامݨے رکھݨ ضروری ہوندے ۔ سپریم کورٹ اے وی قرار ݙتا جو کیپیٹل ڈیولپمنٹ اتھارٹی دے ریکارڈ اچ تھرڈ پارٹی حقوق دی منتقلی کوں نظر انداز کائنی کیتا ونڄ سڳدا۔ عدالت دے ایں فیصلے دے نال ہی سیکٹر E-12 دے پلاٹ متعلق 26 سالاں دا پراݨا جھیڑا اپݨے انجام کوں پڄ ڳئے